"ოცნება“ დღეს გახდა უარესი, ვიდრე სააკაშვილის პერიოდი , - ამის შესახებ საქართველოს პრეზიდენტმა, სალომე ზურაბიშვილმა „საზოგადოებრივი მაუწყებლის“ ეთერში საქართველოს მესამე პრეზიდენტ, მიხეილ სააკაშვილზე საუბრისას განაცხადა.
როგორც პრეზიდენტი განმარტავს, „ქართულ ოცნებას“ ერთი სული აქვს მიხეილ სააკაშვილი იყოს მუდმივად მისი ერთადერთი ოპონენტი.
„სხვათა შორის, არაერთხელ შევხვდი რატი ბრეგაძეს ამ საკითხზე, როდესაც იყო ჰუმანური, ჯანმრთელობის პრობლემა. არაერთხელ მითქვამს, რომ ეს საკითხი თქვენი გადასაწყვეტია - მთავრობის მიერ, პოლიტიკური საკითხია და არა შეწყალების. შეწყალება სხვა რამეს ეხება, მორალურ განზომილებას, ამიტომ ვთქვი: „არა“.
„ოცნებას“ ერთი სული აქვს, მიშა იყოს მუდმივად მისი ერთადერთი ოპონენტი. ამიტომ არის, რომ თუ რაიმე ხმები შეინარჩუნეს დღემდე, არის იმ ადამიანებისგან, ვისაც ის პერიოდი ახსოვს. „ოცნება“ დღეს გახდა უარესი, ვიდრე სააკაშვილის პერიოდი. გაიმეორა და დაუმატა ერთადერთი რამ, რაც არ ჰქონდა სააკაშვილის პერიოდს. ავტორიტარიზმს, ერთპარტიულობას, არჩევნების გაყალბებას, ადამიანების უფლებების დარღვევას, ბიზნესის დამონებას, დაუმატა რუსეთი“, - აღნიშნა პრეზიდენტმა.
