პროკურატურა ჯგუფურ ძალადობაში მონაწილეობის ბრალდებით დაკავებული მსახიობის, ანდრო ჭიჭინაძის, ასევე იუმორისტ ონისე ცხადაძისა და კიდევ 4 პირის პირის მიმართ აღკვეთის ღონისძიების სახით პატიმრობის გამოყენებას ითხოვს.

ამ წუთებში, პროცესზე, რომელიც თბილისის საქალაქო სასამართლოში მიმდინარეობს, პროკურორი გიორგი მუკბანიანი შუამდგომლობას წარადგენს, სადაც მიუთითებს, თუ რა ქმედებების განხორციელებას ედავებიან თითოეულ დაკავებულს.

მისი თქმით, ბრალდებულები სამართალდამცავების მიმართ უწყვეტად ახორციელებდნენ ძალადობას, ისინი მათ სხვადასხვა საგნებსა და ნივთებს ესროდნენ, რითაც ისინი პოლიციელთა და სხვათა მიმართ ჯანმრთელობას საფრთხეს უქმნიდნენ. არბევდნენ, აზიანებდნენ ნივთებს.

„ანდრო ჭიჭინაძე საქართველოს პარლამენტის მიმდებარე ტერიტორიაზე საპროტესტო აქციაზე იმყოფებოდა, ის ჯოხს ისროდა სამართალდამცავების მიმართულებით, რითაც მათ და სხვა პირთა ჯანმრთელობას საფრთხეს უქმნიდა.

ჯგუფურ ძალადობაში მონაწილეობდა ონისე ცხადაძეც. ის ჯოხს და სხვა ნივთებს ისროდა სამართალდამცავების მისამართით, რითაც პოლიციელებისა და სხვათა ჯანმრთელობას საფრთხეს უქმნიდა“, - განაცხადა მუკბანიანმა.

ცნობისთვის, მსახიობ ანდრო ჭიჭინაძეს, იუმორისტ ონისე ცხადაძესა და კიდევ 4 პირს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინა, რაც ჯგუფურ ძალადობაში მონაწილეობას გულისხმობს. აღნიშნული დანაშაული სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.