თბილისის საკრებულოში სხდომა მიმდინარეობს, სადაც თბილისის მერი კახა კალაძე დედაქალაქის მერიის წლიურ ანგარიშს წარადგენს.

ამასთან, სხდომაზე დედაქალაქის 2025 წლის ბიუჯეტიც განიხილება გასამტკიცებლად.

სხდომას საკრებულოს თავმჯდომარე, გიორგი ტყემალაძე უძღვება.

როგორც სხდომის დაწყებამდე გიორგი ტყემალაძემ განაცხადა, დღეს მერის წლიურ ანგარიშთან ერთად მოისმენენ 2025 წლის დასამტკიცებელ ბიუჯეტს, რომლის ოდენობაც 1 მილიარდ 983 მილიონ ლარს შეადგენს.

„დღეს ვაჯამებთ 2024 წელს თბილისში განხორციელებული პროექტების მიმართულებით. ჩვენ მოვისმენთ მერის ანგარიშს და ასევე განვიხილავთ 2025 წლის ბიუჯეტის პროექტს. 2024 წელი ქალაქის განვითარების მიმართულებით იყო ძალიან მნიშვნელოვანი, განხორციელდა ბევრი ინფრასტრუქტურული პროექტი, ძალიან მნიშვნელოვანი იყო ასევე. სატრანსპორტო და სოციალური პოლიტიკის მიმართულებით. ჩვენ ამ თემაზე დეტალური განხილვა გვექნება, მოვისმენთ მერის ანგარიშს.

ასევე, 2025 წლის წარმოდგენილი ბიუჯეტის პროექტი, რომელიც არის 1 მილიარდ 983 მილიონი და რომელიც, ვვარაუდობთ, რომ იანვრის ბოლოსთვის დაახლოებით 150 მილიონი ლარით, გარდამავალი ნაშთის შესაბამისად გაიზრდება გაიზრდება. ეს უპრეცედენტოდ მაღალი ნიშნულია თბილისის ბიუჯეტის”, - განაცხადა ტყემალაძემ.

საკრებულოს თავმჯდომარემ ასევე ისაუბრა თემაზე, რომელიც ოპოზიციონერების ბოიკოტს შეეხებოდა და აღნიშნა, რომ წელს კი არა 8 წლის განმავლობაში ოპოზიციურ კოლეგებს არცერთი ბიუჯეტისთვის მათ მხარი არ დაუჭერიათ.

„არცერთი მნიშვნელოვანი გადაწყვეტილების მიღების დროს მათ პასუხისმგებლობა არ აუღიათ. ეს კიდევ ერთხელ ადასტურებს, რომ ეს მათი დღის წესრიგია და აგრძელებენ ბოიკოტის რეჟიმში ყოფნას“, - განაცხადა ტყემალაძემ.