სამხრეთ კორეის ანტიკორუფციული სააგენტოს განცხადებით, სასამართლომ იმპიჩმენტირებული პრეზიდენტის, იუნ სუკ იოლის დაკავებისა და მისი ოფისის ჩხრეკის შესახებ ორდერები გასცა, - ინფორმაციას Associated Press-ი ავრცელებს.

სააგენტომ განაცხადა, რომ მიმდინარეობს გამოძიება იმასთან დაკავშირებით, იყო თუ არა იუნ სუკ იოლის მიერ საომარო მდგომარეობის გამოცხადება ამბოხება. ამასთან, მან უგულებელყო საგამოძიებო ორგანოების არაერთგზის თხოვნა, მისულიყო დაკითხვაზე და მათთვის ოფისში ჩხრეკის ჩატარების უფლება მიეცა.

იუნ სუკ იოლს სისხლისსამართლებრივი დევნისგან საპრეზიდენტო იმუნიტეტი იცავს, მაგრამ ეს არ ვრცელდება ამბოხების ან ღალატის ბრალდებებზე.

ანტიკორუფციულმა სააგენტომ განაცხადა, რომ არ აქვს უშუალო გეგმები, თუ როგორ იმოქმედოს სასამართლოს მიერ გაცემულ ორდერებთან დაკავშირებით.

შეგახსენებთ, იუნ სუკ იოლს უფლებამოსილება შეუჩერდა მას შემდეგ, რაც ოპოზიციის მიერ კონტროლირებადმა ეროვნულმა ასამბლეამ 14 დეკემბერს მხარი დაუჭირა მის იმპიჩმენტს, თუმცა საკონსტიტუციო სასამართლომ უნდა გადაწყვიტოს, გადააყენოს ის პრეზიდენტის პოსტიდან თუ აღადგინოს თანამდებობაზე.