რუსებმა ჩვენს წინააღმდეგ მხოლოდ ერთ კვირაში 700-მდე საავიაციო ბომბი და 600-ზე მეტი თავდასხმის დრონი გამოიყენეს, - ამის შესახებ უკრაინის პრეზიდენტი, ვოლოდიმირ ზელენსკი სოციალურ ქსელში წერს, სადაც თავდასხმის ამსახველ კადრებს ავრცელებს.

მისი ინფორმაციით, გასული კვირის განმავლობაში რუსებმა უკრაინის ქალაქებზე, სოფლებსა და ფრონტის ხაზზე ჩვენი მეომრების პოზიციებზე ასობით დარტყმა განახორციელეს.

„რუსეთის ომი გრძელდება მხოლოდ იმიტომ, რომ რუსული არმია ინარჩუნებს უკრაინის დატერორების უნარს და ცაში მისი უპირატესობის გამოყენების უნარს. ამიტომაც გადამწყვეტია ჩვენი პარტნიორების მხრიდან ჩვენთან უკვე დადებული შეთანხმებების შესრულება. ვაშინგტონში ნატო-ს სამიტზე მიღებული გადაწყვეტილებები, ისევე როგორც „რამშტაინის“ შეხვედრებზე მიღებული გადაწყვეტილებები უკრაინის საჰაერო თავდაცვასთან დაკავშირებით, ჯერ კიდევ არ არის სრულად განხორციელებული“, - წერს პრეზიდენტი ზელენსკი.

მისი თქმით, უკრაინამ პარტნიორებთან, მათ შორის შეერთებულ შტატებთან, უკრაინისთვის საჰაერო თავდაცვის სისტემებისა და რაკეტების წარმოების ლიცენზიების მინიჭების შესაძლებლობა განიხილა

„ამაში შეუძლებელი არაფერია და ეს მხოლოდ გააძლიერებს ჩვენს საერთო შესაძლებლობებს უსაფრთხოების უზრუნველსაყოფად. ეს არის ზუსტად ისეთი ძალა, რომელიც შესაძლებელს ხდის მუდმივ მშვიდობას. რუსეთი თავისი ნებით არ წყვეტს ომებს - მას მშვიდობა შეიძლება მხოლოდ აიძულო. ამ იძულების ნაწილი საჰაერო თავდაცვის სისტემების საკმარისი რაოდენობა და ხარისხი უნდა იყოს“, - აცხადებს ზელენსკი.