ირაკლი კობახიძე - ფიზიკური აგრესიის წამოწყება მოხდა გახარიას მხრიდან - როცა ადამიანი გეუბნება მარტივ ჭეშმარიტებას: „შენ ხარ ნაცი“, „შენ ხარ ჯაშუში“, როდესაც მართლა „ნაცი“ ხარ და ჯაშუში, გეკისრება თმენის ვალდებულება

ფიზიკური აგრესიის წამოწყება მოხდა გახარიას მხრიდან - შემიძლია გიორგი გახარიასთან დაკავშირებით ვთქვა ერთი რამ: როდესაც შენთან მოდის ადამიანი და გეუბნება მარტივ ჭეშმარიტებას: „შენ ხარ ნაცი“, „შენ ხარ ჯაშუში“, როდესაც მართლა „ნაცი“ ხარ და ჯაშუში, გეკისრება თმენის ვალდებულება, - ამის შესახებ პრემიერმა, ირაკლი კობახიძემ ბათუმის სასტუმრო „შერატონში“ მომხდარ ინციდენტზე საუბრისას განაცხადა.

მისივე თქმით, თავიდან იყო სიტყვიერი შელაპარაკება, რასაც ძალადობრივი აქტი მოჰყვა გიორგი გახარიას მხრიდან.

„თქვენ ნახეთ, როგორ წარიმართა ინციდენტი. იყო სიტყვიერი შელაპარაკება, რასაც ძალადობრივი აქტი მოჰყვა გახარიას მხრიდან, ჭიქა ესროლა და ყავა შეასხა „ქართული ოცნების“ პოლიტიკური საბჭოს წევრს, პარლამენტის წევრს. ფიზიკური აგრესიის წამოწყება მოხდა გახარიას მხრიდან. ამას მოჰყვა გაგრძელება. ყველა დეტალი უნდა იყოს შესწავლილი. შემიძლია გიორგი გახარიასთან დაკავშირებით ვთქვა ერთი რამ: როდესაც ხარ „ნაცი“ თმენის ვალდებულება გეკისრება. როდესაც შენთან მოდის ადამიანი და გეუბნება მარტივ ჭეშმარიტებას, „შენ ხარ ნაცი“, „შენ ხარ ჯაშუში“, როდესაც მართლა „ნაცი“ ხარ და ჯაშუში, გეკისრება თმენის ვალდებულება. ეს არის მარტივი რამ რაც შემიძლია ვუთხრა როგორც გახარიას, ისე სხვა „ნაცებს“,- აღნიშნა კობახიძემ.

ცნობისთვის, „გახარია საქართველოსთვის“ ლიდერს, გიორგი გახარიას ბათუმში, სასტუმრო „შერატონში“ თავს 15 იანვარს დაესხნენ. გახარია კლინიკაში გადაიყვანეს, თუმცა საავადმყოფო მოგვიანებით დატოვა. ექიმის განცხადებით, გიორგი გახარიას ცხვირის ძვლის მოტეხილობა და ტვინის შერყევა ჰქონდა. ერთ-ერთი პირი, რომელიც გახარიასთან ფიზიკურ დაპირისპირებაში მონაწილეობდა „ქართული ოცნების“ დეპუტატი დიმიტრი სამხარაძეა.