თუ „ნაციონალური მოძრაობის“ ხელისუფლების საქმიანობის სამართლებრივი შეფასების მიზნით, დროებითი საგამოძიებო კომისია შეიქმნება, ანუ კლოუნადა ამ არალეგიტიმურ პარლამენტში, რა თქმა უნდა, დემონსტრაციულად არ ვაპირებ მისვლას, - ამის შესახებ პარტია “ფედერალისტების” დამფუძნებელმა გიგა ბოკერიამ "პალიტრანიუსის" გადაცემა “360 გრადუსში” პარლამენტში საგამოძიებო კომისიის შექმნასთან დაკავშირებით განაცხადა.

კითხვაზე, შესაძლებელია თუ არა, დროებით საგამოძიებო კომისიის მოთხოვნაზე დაუმორჩილებლობის გამო მას ბრალი წაუყენონ, გიგა ბოკერიამ განაცხადა, რომ „ეს უდავოდ შეიძლება მოხდეს“, თუმცა, მისივე თქმით, „ამით ვერაფერს მოიგებენ“.

“თუ ეს კომისია შეიქმნება, ანუ კლოუნადა ამ არალეგიტიმურ პარლამენტში, რა თქმა უნდა, დემონსტრაციულად არ ვაპირებ მისვლას. კითხვა-პასუხის შიში კი არ მაქვს. მე პირადად, არ ვაპირებ, რომ ეს გავხადო ცენტრალურ თემად და მერე სასამართლოს კლოუნადები ვამართინო. თუ გადაწყვეტენ ამა თუ იმ პოლიტიკური ოპონენტის დაკავებას, ეს არის ნაწილი ბევრად უფრო დიდი პრობლემის, რომ ქვეყნის თავისუფლებასა და სახელმწიფოებრიობას უქმნიან საფრთხეს. პოლიტიკური დევნა, თავისთავად, უზარმაზარი პრობლემაა, ეგ სჭირდებათ თქვან, რომ ეს არის ბრძოლა ყოფილ ხელისუფლების წარმომადგენლებს, ანუ დღევანდელ ოპოზიციასა და ჩვენს შორის. ეგ უნდათ და ამისთვის აკეთებენ მხოლოდ და მხოლოდ, რომ სცადონ ჩვენი საზოგადოების ნაწილის შეცდომაში შეყვანა”, - განაცხადა ბოკერიამ.

ბოკერია ასევე შეეხო პარტიის “გახარია საქართველოსთვის” წევრების მიერ მანდატების არდატოვების საკითხსაც და აღნიშნა, რომ არგუმენტი იმუნიტეტის თაობაზე არასერიოზულია, რადგან ამ რეჟიმის პირობებში ეს ინსტრუმენტი არ მუშაობს.

“მე როგორც მახსოვს, გახარიას პარტიას ნათქვამი აქვს, რომ მანდატებზე უარის თქმის განაცხადს მერე შევიტანთო და ჩემთვის ეგეც არ იქნება გასაგები, თუ ამას რაღაც მიზეზით წელავენ. ის არგუმენტი, რომ რაღაც იმუნიტეტი იცავს მათ, ჩემი აზრით, არ არის სერიოზული იმიტომ, რომ ამ რეჟიმის პირობებში ეგ ინსტრუმენტი არ მუშაობს. თუმცა, არ არის ეს ჩემთვის მთავარი და გადამწყვეტი საკითხი. ოპოზიციური კლასის კრიზისი ბევრად უფრო ღრმა არის, ვიდრე ერთი ცალკეული პარტიის მიერ მიღებული გადაწყვეტილება”, - განაცხადა ბოკერიამ.