ბათუმში, უხვი ნალექის შედეგად, კობალაძის ქუჩაზე მსუბუქი ავტომობილები დაზიანდა - საცხოვრებელი კორპუსების სახურავებიდან თოვლის მასა ცვივა
ბათუმში, უხვი ნალექის შედეგად, კობალაძის ქუჩაზე მსუბუქი ავტომობილები დაზიანდა.
მოქალაქეების თქმით, თოვლის მასა საცხოვრებელი კორპუსების სახურავებიდან ცვივა და აზიანებს, როგორც მწვანე ნარგავებს, ასევე კომერციულ ფართებს.
„ქუჩაში გადაადგილება საფრთხის შემცველია, კორპუსებიდან თოვლის მასა ვარდება აზიანებს ყველაფერს. ქვეითები მოერიდეთ ტროტუარებზე გადაადგილებას. ხეებს ტოტები ტყდება. მანქანებით გადაადგილებაც შეუძლებელია. ბათუმის შემოსასვლელ ცენტრალურ საავტომობილო გზაზე წყალია”,- აცხადებენ მოქალაქეები.
თავის მხრივ, ბათუმის მერიაში აცხადებენ, რომ ქუჩების გაწმენდითი სამუშაოები მთელი ღამის განმავლობაში მიმდინარეობდა.
„მთელი ღამის განმავლობაში ბათუმში მიმდინარეობდა ქუჩების გაწმენდითი სამუშაოები.ასევე შეფერხებაა წყალმომარაგების ნაწილში, დაზიანდა 1000 მმ-იანი წყალმომარაგების ცენტრალური მილი, რომლის ლოკალიზებისა და ლიკვიდაციის სამუშაოები ამ ეტაპისთვის მიმდინარეობს.
დღის განმავლობაში აღმოიფხვრება დაზიანება და ეტაპობრივად აღდგება წყალმომარაგება.
ამავდროულად, ყველა შესაბამისი მუნიციპალური სამსახური აქტიურად მუშაობს, რათა მინიმალური შეფერხებები ჰქონდეს ჩვენს თანაქალაქელებს წყლის, ელექტროენერგიისა და ბუნებრივი აირის მიწოდების ნაწილში.
გამოდარებასთან ერთად, გაიწმინდება ცენტრალური და მეორეხარისხოვანი ქუჩები, შესაბამისად, აღდგება სატრანსპორტო მიმოსვლა და საგანმანათლებლო პროცესი”, - აცხადებენ ბათუმის მერიაში.
