რელიგიის საკითხთა სახელმწიფო სააგენტოს თავმჯდომარეს, ზაზა ვაშაყმაძეს, საქართველოში გაეროს მუდმივი წარმომადგენელი, დიდიე ტღებიუკი ეწვია. ამის შესახებ ინფორმაციას რელიგიის საკითხთა სახელმწიფო სააგენტოს პრესსამსახური ავრცელებს.

მათივე ცნობით, შეხვედრა, ტრადიციულად საქართველოს რელიგიური პოლიტიკის შესახებ მოკლე მიმოხილვით დაიწყო. სააგენტოს თავმჯდომარემ სტუმარს გააცნო საქართველოში არსებული რელიგიური კონფესიები, რელიგიის სააგენტოს ურთიერთობები მათთან, სააგენტოს მიერ განხორციელებული პროექტები.

„ზაზა ვაშაყმაძემ ყურადღება გაამახვილა სახელმწიფოს მხრიდან საბჭოთა პერიოდში მიყენებული მატერიალური და მორალური ზიანის ასანაზღაურებლად გამოყოფილი თანხების გადანაწილების პრაქტიკასა და ზოგადად, სხვადასხვა საჭიროებებისთვის სახელმწიფოს მხრიდან გაწეულ დახმარებაზე.

ზაზა ვაშაყმაძემ ყურადღება გაამახვილა საქართველოს ოკუპირებულ ტერიტორიებზე მცხოვრები ქართველი მოსახლეობის რელიგიური უფლებების დარღვევის ფაქტებზე და აღნიშნა, რომ ოკუპირებულ ტერიტორიებზე სისტემატურად ხდება ქართული ეთნიკური, რელიგიური და კულტურული კვალის წაშლა. სააგენტოს თავმჯდომარე შეეხო, აგრეთვე, ინტერრელიგიური სათათბიროს საქმიანობას, სააგენტოსა და გაეროს ბავშვთა ფონდის ნაყოფიერ თანამშრომლობას და ერთობლივად განხორციელებულ პროექტებს.

გაეროს მუდმივმა წარმომადგენელმა მადლობა გადაუხადა სააგენტოს თავმჯდომარეს მასპინძლობისთვის და გამოთქვა სააგენტოსთან თანამშრომლობის გაგრძელების სურვილი. შეხვედრის დასასრულს, სტუმარს რელიგიის სააგენტოს გამოცემები უსახსოვრეს. შეხვედრა გაცნობით ხასიათს ატარებდა“, - აღნიშნულია გავრცელებულ ინფორმაციაში.