მზია ამაღლობელს უტარდებოდა კვების აღდგენითი კურსი შესაბამისი გაიდლაინის მიხედვით, ვაპირებდით ამ კურსის გაგრძელებას, მაგრამ ითხოვს პენიტენციურში დაბრუნებას, ჩვენ გავცემთ არსებული გაიდალინის შესაბამის რეკომენდაციას, რაც გაგრძელდება პენიტენციურ დაწესებულებაში, - ამის შესახებ კლინიკა „ვივამედის“ კლინიკურმა დირექტორმა, ზურაბ ჩხაიძემ „ინტერპრესნიუსთან“ საუბრისას განაცხადა.
როგორც ზურაბ ჩხაიძემ აღნიშნა, „ბათუმელების“ დამფუძნებლის, მზია ამაღლობელის ჯანმრთელობის მდგომარეობა დამაკმაყოფილებელია.
„ლაბორატორიული კვლევის შედეგებიც დამაკმაყოფილებელია, მას უტარდებოდა კვების აღდგენითი კურსი გაიდლაინის შესაბამისად, ვაპირებდით ამ კურსის გაგრძელებას მაგრამ პაციენტი ითხოვს პენიტენციურში დაბრუნდეს, ჩვენ გავცემთ რეკომენდაციას არსებული გაიდალინის შესაბამისად, რაც გაგრძელდება შესაბამის პენიტენციურ დაწესებულებაში“,-აღნიშნა ჩხაიძემ.
ცნობისთვის, საია-ს ინფორმაციით, მზია ამაღლობელს დღეს „ვივამედიდან“ პენიტენციურ დაწესებულებაში გადაიყვანენ. მზია ამაღლობელმა შიმშილობა 18 თებერვალს შეწყვიტა. მზია ამაღლობელმა, რომელიც ბათუმის პოლიციის უფროსის, ირაკლი დგებუაძისთვის სილის გაწვნის ფაქტზე, პოლიციელზე თავდასხმის ბრალდებით დააკავეს, შიმშილობის შეწყვეტის გადაწყვეტილება 38-ე დღეს მიიღო. ის დაკავების მომენტიდან შიმშილობდა.
