ევროკავშირი 28 მილიარდი დოლარის ღირებულების ამერიკულ საქონელზე ტარიფებს დააწესებს, - ამის შესახებ ინფორმაციას სააგენტო Reuters-ი ევროკომისიაზე დაყრდნობით ავრცელებს.

დღეს, აშშ-ის პრეზიდენტის, დონალდ ტრამპის მიერ ფოლადისა და ალუმინის იმპორტზე დაწესებული 25%-იანი ტარიფები ძალაში შევიდა.

აშშ-ის პრეზიდენტის გადაწყვეტილების საპასუხოდ, ევროკომისიამ განაცხადა, რომ ევროკავშირი აპრილში ამერიკულ პროდუქციაზე საწინააღმდეგო ზომებს მიიღებს.

„ეს აშშ-ს ტარიფების ეკონომიკურ მასშტაბებს შეესაბამება. ჩვენი საპასუხო ზომები ორ ეტაპად ამოქმედდება. იგი 1-ელ აპრილს დაიწყება და 13 აპრილიდან სრულად ამოქმედდება“, - განაცხადა ევროკომისიის პრეზიდენტმა, ურსულა ფონ დერ ლაიენმა.

ამასთან, ურსულა ფონ დერ ლაიენის თქმით, ევროკავშირი კონსტრუქციული დიალოგისთვის მზად არის.

ცნობისთვის, გუშინ, აშშ-ის პრეზიდენტი, დონალდ ტრამპი კანადას აშშ-ში შემავალ ფოლადსა და ალუმინზე ტარიფების 50%-მდე გაზრდით დაემუქრა, თუმცა მოგვიანებით გეგმის განხორციელებაზე უარი განაცხადა, მას შემდეგ, რაც კანადის ონტარიოს პროვინციის პრემიერმა, დაგ ფორდმა მინესოტას, ნიუ-იორკისა და მიჩიგანის შტატებისთვის ონტარიოდან ელექტროენერგიის ექსპორტზე 25%-იანი დამატებითი გადასახადის დაწესება შეაჩერა.