გრენლანდიის არჩევნებში გამარჯვებული მემარჯვენე-ცენტრისტული „დემოკრატიული“ პარტიის ლიდერი, იენს-ფრედერიკ ნილსენი აშშ-ის პრეზიდენტის, დონალდ ტრამპის განცხადებას ეხმაურება და აცხადებს, რომ გრენლანდიელებმა თავად უნდა გადაწყვიტონ საკუთარი მომავალი.

„ჩვენ არ გვინდა ვიყოთ ამერიკელები. არა, ჩვენ არ გვინდა ვიყოთ დანიელები. ჩვენ გვინდა ვიყოთ გრენლანდიელები და გვინდა დამოუკიდებლობა მომავალში. ჩვენ გვსურს თავად ავაშენოთ ჩვენი საკუთარი ქვეყანა“, - განაცხადა ნილსენმა.

ცნობისთვის, იენს-ფრედერიკ ნილსენი გრენლანდიის სავარაუდო მომავალი პრემიერ-მინისტრია, რადგან მისმა პარტიამ 11 მარტს გამართულ საკანონმდებლო არჩევნებში გაიმარჯვა და ახლა, კოალიციური მთავრობის ჩამოყალიბების მიზნით, სხვა პარტიებთან მოლაპარაკებებს აწარმოებს.

ცნობისთვის, აშშ-ის პრეზიდენტმა დონალდ ტრამპმა გრენლანდიასთან დაკავშირებით გუშინ კიდევ ერთხელ ისაუბრა და განაცხადა, რომ აშშ-ს გრენლანდია ეროვნული უსაფრთხოებისთვის სჭირდება.

ჟურნალისტის კითხვაზე, როგორია მისი ხედვა გრენლანდიის პოტენციურ ანექსიაზე, ტრამპმა უპასუხა: „ვფიქრობ, ეს მოხდება“.