„იბრძოლეთ, სანამ გვიანი არ არის“, „სოლიდარობა მზია ამაღლობელს“, - ამ ლოზუნგით ბათუმის საქალაქო სასამართლოსთან ჟურნალისტების აქცია მიმდინარეობს

„იბრძოლეთ, სანამ გვიანი არ არის“, „სოლიდარობა მზია ამაღლობელს“, - ამ ლოზუნგით ბათუმის საქალაქო სასამართლოსთან, სადაც გამოცემა „ბათუმელების“ დამფუძნებლის, მზია ამაღლობელის საქმის არსებითი განხილვა უნდა დაიწყოს, ჟურნალისტები აქციას მართავენ.

მათი განცხადებით, დღევანდელი პროცესიდან პოზიტიური შედეგის მოლოდინი არ აქვთ. მათი თქმით, ქვეყანაში ჟურნალისტების დევნა მიმდინარეობს.

„მზია ამაღლობელის მიმართ გატარებული ღონისძიებები პოლიტიკური დევნაა, ის პოლიტპატიმარია. სასამართლოდან დადებითი მოლოდინი არ გვაქვს. ქალბატონ მზიას მხარდასაჭერად შევიკრიბეთ“, - აცხადებენ შეკრებილები.

მზია ამაღლობელის პროცესი ბათუმის საქალაქო სასამართლოში 14:00 საათზეა ჩანიშნული.