საზოგადოებრივი მაუწყებლის სამეურვეო საბჭოს სხდომის პარალელურად, პირველი არხის შენობასთან მოქალაქეები აქციას მართავენ.

მათ ადგილზე სხვადასხვა შინაარსის ბანერები აქვთ მიტანილი, წარწერით: „სინათლე - სიმართლეს“, „ეთერი ხალხს“, „ვერ ჩაახშობთ ხალხის ხმას“.

მათი თქმით, საზოგადოებრივი მაუწყებელი საზოგადოებას უკვე დიდი ხანია, რაც აღარ ემსახურება.

აქციის მონაწილეებმა, ხმაურის ფონზე შეაცილეს სამეურვეო საბჭოს ერთ-ერთი წევრი, ბონდო მძინარაშვილი.

ამასთან, შსს-ს თანამშრომლებმა აქციის მონაწილეებს ღობეზე ბანერის ჩამოკიდების საშუალება არ მისცეს და ისინი გააფრთხილეს, რომ ხელი არ შეუშალონ შენობაში შემსვლელ პირებს.

აქციის მონაწილეების განცხადებით, საზოგადოებრივ მაუწყებელში სამეურვეო საბჭოს სხდომაზე ბორდის ახალი თავმჯდომარე უნდა აირჩიონ, თუმცა მათ მიაჩნიათ, რომ ბორდის თავმჯდომარის თანამდებობას, კვლავ ვასილ მაღლაფერიძე დაიკავებს.