ნატო-ს მაღალჩინოსანი - უკრაინაში 900 000-ზე მეტი რუსი სამხედრო დაიღუპა და დაიჭრა
უკრაინაში სრულმასშტაბიანი შეჭრის დაწყების შემდეგ, რუსეთის 900 000-ზე მეტი სამხედრო მოსამსახურე დაიღუპა და დაიჭრა, - „დოიჩე ველეს“ ცნობით, ეს მონაცემები ნატო-ს მაღალჩინოსანმა ბრიუსელში, ალიანსის ქვეყნების საგარეო საქმეთა მინისტრების შეხვედრის ფარგლებში გამართულ ბრიფინგზე წარადგინა.
მისივე განცხადებით, აქედან 250 000 დაღუპულია. ამასთან, დაჭრილ რუს სამხედროებს შორის ბევრმა, უხარისხო სამედიცინო დახმარების გამო, სამუდამო დაზიანებები მიიღო.
ჩრდილოატლანტიკური ალიანსის თანახმად, ყოვლ დღე 1 000 რუსი ჯარისკაცი იღუპება და იჭრება, მაგრამ ახალწვეულების რეკრუტირების ტემპი ჯერჯერობით ემთხვევა მის დანაკარგებს.
”რუსული ჯარების წინსვლა უკრაინაში ნელდება, მისი დანაკარგები იზრდება, მაგრამ რუსეთის ხელისუფლება მზად არის გააგრძელოს მძიმე დანაკარგების ატანა ნელი წარმატებების სანაცვლოდ,” -აღნიშნა ნატო-ს მაღალჩინოსანმა.
მისი თქმით, არ სჯერა, რომ რუსული საზოგადოება მივიდა იქამდე, რომ აღარ არის მზად ამას შეეგუოს.
ნატო-ს შეფასებით, ვითარება ბრძოლის ველზე ძალიან მძიმე რჩება. ალიანსის პროგნოზით, რუსეთი გააგრძელებს უკრაინის შეიარაღებულ ძალებზე ფრონტის ხაზზე და ზოგადად მთელ უკრაინაში ზეწოლას, რათა გაახანგრძლივოს ომი და გაზარდოს თავისი უპირატესობა მოლაპარაკებებში წარმატების მისაღწევად.
„ბრძოლის ველზე არ არსებობს არანაირი ნიშანი იმისა, რომ რუსები ემზადებიან ცეცხლის შეწყვეტისთვის. ჩვენ ვერ ვხედავთ იმის ნიშანს, რომ ამ ომში რუსეთის მიზნები შეიცვალა“, - განაცხადა ნატო-ს მაღალჩინოსანმა.
v-if="article.gallery" v-html="article.gallery"
