ირანის უდიდეს პორტში, ბანდარ აბასში, შაჰიდ რაჯაის მონაკვეთზე მომხდარი აფეთქების შედეგად 4 ადამიანი დაიღუპა და 500-ზე მეტი დაშავდა, - ინფორმაციას Reuters-ი ირანულ მედიაზე დაყრდნობით ავრცელებს.

ირანის კრიზისების მართვის ორგანიზაციის წარმომადგენელის, ჰოსეინ ზაფარის თქმით, აფეთქება, როგორც ჩანს, შაჰიდ რაჯაის კონტეინერებში ქიმიკატების არასწორმა შენახვამ გამოიწვია, თუმცა ირანის მთავრობის პრესსპიკერმა განაცხადა, რომ მიუხედავად იმისა, რომ აფეთქება, სავარაუდოდ, ქიმიკატებმა გამოიწვია, ზუსტი მიზეზის დადგენა ჯერჯერობით შეუძლებელია.

ირანული მედიის ცნობით, აფეთქების ხმამ რამდენიმე კილომეტრის რადიუსში ფანჯრების მსხვრევა გამოიწვია და კუნძულ კეშმზეც გაისმა, რომელიც პორტიდან სამხრეთით 26 კილომეტრში მდებარეობს.