საპროცედურო საკითხთა და წესების კომიტეტის ინფორმაციით, XI მოწვევის პარლამენტში არც ერთ კომიტეტს და ფრაქციას პარლამენტის წინაშე ანგარიშვალდებული თანამდებობის პირი კომიტეტის სხდომაზე სავალდებულო დასწრების წესით არ მოუწვევია. არც ანგარიშვალდებულ თანამდებობის პირებს მიუმართავთ კომიტეტისთვის მოსმენის მოთხოვნით. აღნიშნული ინფორმაცია საპროცედურო საკითხთა და წესების კომიტეტმა დღევანდელ სხდომაზე ცნობად მიიღო. კომიტეტის დასკვნა 2025 წლის 1-ელ მარტამდე პერიოდს მოიცავს.

ამ კონტექსტში აღსანიშნავია, რომ XI მოწვევის პარლამენტში არც “მინისტრის საათი“ გამართულა, რასაც ჯერ კიდევ მოქმედი რეგლამენტი ითვალისწინებს. ახალი რეგლამენტის პროექტის თანახმად კი, რომელიც განხილვის პროცესშია, “მინისტრის საათის“ ფორმატი საერთოდ უქმდება.

ცნობისთვის, რეგლამენტის მე-40 მუხლის თანახმად, მთავრობის წევრი, პარლამენტის წინაშე ანგარიშვალდებული სხვა თანამდებობის პირი უფლებამოსილია, ხოლო მოთხოვნის შემთხვევაში – ვალდებულია კომიტეტის სხდომას დაესწროს, სხდომაზე დასმულ შეკითხვებს პასუხი გასცეს და გაწეული საქმიანობის ანგარიში წარადგინოს. ამასთან, ასეთ პირს კომიტეტმა მოთხოვნისთანავე უნდა მოუსმინოს.