ვიქტორ ორბანი - უკრაინის ევროკავშირში გაწევრიანება უნგრეთის ეკონომიკას გააკოტრებს
უკრაინის ევროკავშირში გაწევრიანება უნგრეთის ეკონომიკას გააკოტრებს, ეს არის როგორც უნგრეთის ეროვნული ინტერესის, ასევე ევროპის ინტერესის საკითხი. თუ ეს საკითხი წინ წავა, კოლექტიურ ეკონომიკურ ხაფანგში გავეხვევით, - ამის შესახებ უნგრეთის პრემიერ-მინისტრმა, ვიქტორ ორბანმა განაცხადა.
მისი თქმით, ევროკავშირის გეგმა, რომელიც უკრაინის 2030 წლისთვის მიღებას ითვალისწინებს - მიზანი, რომელიც ცოტა ხნის წინ დაადასტურეს ევროკომისიის პრეზიდენტმა ურსულა ფონ დერ ლაიენმა და ევროპის სახალხო პარტიამ - მნიშვნელოვან რისკებს შეიცავს.
„ვიცით, როდის სურთ მათ მათი მიღება. ეს არ არის რაიმე ბუნდოვანი მომავალი; ის აქ არის, ჩვენს კარზე აკაკუნებს“, - განაცხადა უნგრეთის პრემიერ-მინისტრმა.
მან უარყო მტკიცება, რომ გაწევრიანების პირობები ჯერ კიდევ გადაუწყვეტელია და განაცხადა, რომ პროცესი უკვე მიმდინარეობს.
„დაივიწყეთ ზღაპრები იმის შესახებ, თუ როდის და როგორ. მათ სურთ ამის გაკეთება ახლავე, რაც შეიძლება სწრაფად“, - აღნიშნა ორბანმა.
მისი თქმით, ევროკავშირის ეკონომიკური სტაგნაცია პირდაპირაა დაკავშირებული უკრაინაში მიმდინარე ომთან და ევროპიდან გაგზავნილ ფინანსურ დახმარებასთან.
„ამ უბედურმა ევროპელმა ლიდერებმა უკვე გაუგზავნეს 140 მილიარდი ევრო უკრაინას. ეს ფული რომ ევროპულ ეკონომიკაში ყოფილიყო, სტაგნაციის ნაცვლად ზრდა იქნებოდა“, - განაცხადა უნგრეთის პრემიერმა.
მისი თქმით, დანაკარგი უზარმაზარია მხოლოდ უნგრეთისთვისაც.
„სამ წელიწადში უნგრეთმა ომის გამო 20 მილიარდი ევრო დაკარგა. ჩვენ 10 მილიონიანი ქვეყანა ვართ. თუ ამდენი დავკარგეთ, რამდენი დაკარგეს გერმანელებმა, თავიანთი 84 მილიონიანი მოსახლით?“, - აღნიშნა ორბანმა.
მისი თქმით, მთავრობა არ დაუშვებს, რომ უნგრეთს უკრაინის ინტეგრაციის დასაფინანსებლად ევროკავშირის საერთო ვალი დაეკისროს.
„ბრიუსელის ელიტას ერთად უზარმაზარი სესხების აღება სურს. თუმცა, ვალი გაკოტრებამდე მიგვიყვანს. თუ ჩვენ ისე ვისესხებთ, როგორც ახლა, როდესაც ევროპა არაკონკურენტუნარიანია, ჩვენს შვილებსა და შვილიშვილებს ვალების მთას დავუტოვებთ. ეს არის გზა გიგანტური კოლაფსისკენ“, - აღნიშნა ორბანმა.
v-if="article.gallery" v-html="article.gallery"
