დენის შმიგალი - ევროკავშირი უკრაინას სამხედრო დახმარებისთვის 1.9 მილიარდამდე ევროს გამოუყოფს - ეს ისტორიული გადაწყვეტილებაა, რადგან ჩვენთვის იარაღის შეძენა „ევროპის მშვიდობის ფონდით“, გაყინული რუსული აქტივებიდან მიღებული შემოსავლით მოხდება
ევროკავშირის წევრი ქვეყნების საგარეო საქმეთა მინისტრები, უკრაინის ქალაქ ლვოვში ვიზიტის დროს, ქვეყანას დამატებით 1.9 მილიარდ ევრომდე ოდენობის სამხედრო დახმარებას დაჰპირდნენ, - ამის შესახებ უკრაინის პრემიერ-მინისტრმა დენის შმიგალმა „ტელეგრამზე“ დაწერა.
„დღეს ევროკავშირმა ოფიციალურად გამოაცხადა უკრაინის სამხედრო მხარდაჭერისთვის თითქმის 1.9 მილიარდი ევროს გამოყოფის განზრახვა“, - აღნიშნა შმიგალმა.
უკრაინის პრემიერი ამ გადაწყვეტილებას ისტორიულად მიიჩნევს, რადგან უკრაინისთვის იარაღის შეძენა „ევროპის მშვიდობის ფონდის“ მეშვეობით რუსული გაყინული აქტივებიდან მიღებული შემოსავლით მოხდება.
„ამ თანხიდან 1 მილიარდი ევრო გამოყენებული იქნება იარაღის შესაძენად ე.წ. დანიური მოდელის მიხედვით - პირდაპირ უკრაინელი მწარმოებლებისგან. კიდევ 600 მილიონი ევრო დაიხარჯება არტილერიასა და საბრძოლო მასალაზე. 200 მილიონ ევროზე მეტი კი - უკრაინის საჰაერო თავდაცვის გაძლიერებაზე“, - განმარტა შმიგალმა.
v-if="article.gallery" v-html="article.gallery"
