გენერაციული AI-ს მეშვეობით, MIT-ს მიერ შექმნილი კვლევის უპრენდენტო პლატფორმა ORBIT, ქართული სტარტაპებისთვის ხელმისაწვდომი ხდება.

ბიზნესისა და ტექნოლოგიების უნივერსიტეტის ახალი კამპუსის გახსნაზე, MIT-ს პროფესორმა და ORBIT-ის შემქმნელმა, დაგლას უილიამსმა BTU-ში სტარტაპებისთვის მასტერკლასი ჩაატარა. ORBIT ახალი, ინოვაციური პროდუქტია, რომელიც აერთიანებს MIT-ს ცოდნის ბანკს, 5000-ზე მეტ სამეცნიერო სტატიას და სახელმძღვანელოს, მეწარმეობის 200-ზე მეტ კურსს, ლიტერატურას და წყაროებს დახურული სამეცნიერო და საინფორმაციო ბაზებიდან. პლატფორმა შესაძლებლობას აძლევს სტარტაპებს, გენერაციული AI-ს დახმარებით დაგეგმონ განვითარების და სხვადასხვა ბაზრის ათვისების სტრატეგია, შექმნან ბიზნეს მოდელი, რომელიც ეფუძნება ბილ ოლეტის ,,24 ნაბიჯს წარმატებული სტარტაპის შესაქმნელად’’, დაუკავშირდნენ და დაიწყონ პარტნიორობა MIT-ში დაფუძნებულ სტარტაპებთან, ისარგებლონ რეზიდენტი მეწარმეების (EIRs – Entrepreneurs in Residence) მიერ შემუშავებული რესურსებით და სხვა.

ბიზნესისა და ტექნოლოგიების უნივერსიტეტთან თანამშრომლობის ფარგლებში, MIT ORBIT-ის პლატფორმის გამოყენებით, უკვე იქმნება უნიკალური, სექტორული ანალიტიკის მასალა, კვლევითი ანგარიშები და სტატიები სხვადასხვა დარგის განვითარების პროგნოზების შესახებ, როგორც საქართველოში, ისე მის ფარგლებს გარეთ. ORBIT-ის დახმარებით, კიდევ უფრო იზრდება BTUAI-ს კვლევითი პოტენციალი, რომელიც ქართულ და ინგლისურ ენაზე ქმნის დარგობრივ ანალიტიკას და სტატიებს, საგანმანათლებლო პროდუქტებს, თანამედროვე ბიზნესქეისებს და მულტიმედია მასალას.

MIT ORBIT-ზე წვდომა გაეხსნება ბიზნესისა და ტექნოლოგიების უნივერსიტეტის ყველა სტუდენტს და პროფესორს, აგრეთვე ყველა სტარტაპს, რომელიც თანამშრომლობს BTU-ს მეწარმეობის ცენტრთან.

(R)