ქვეყანას სჭირდება ერთიანობა. გაერთიანება მოხდება მაშინ, როდესაც ტყუილები დასრულდება, როდესაც დეზინფორმაცია დასრულდება, დაჭერები და ცემა დასრულდება და იქნება თანამშრომლობითი გარემო, - ამის შესახებ “სტრატეგია აღმაშენებლის” ლიდერმა გიორგი ვაშაძემ “ინტერპრესნიუსთან” საუბარში განაცხადა.

ვაშაძის თქმით, საქართველოს დამოუკიდებლობის დაცულობის გარანტი სწორედ ევროკავშირია, რომელიც უზრუნველყოფს, რომ მტრის წინაშე მარტო არ დატოვოს ქვეყანა.

“ვულოცავ ყველას დამოუკიდებლობის დღეს. ამ დამოუკიდებლობას დაცვა სჭირდება. ევროკავშირი ჩვენთვის არის სწორედ ის დაცულობა, რაც შეიძლება გვქონდეს ყველაზე მაღალი დონისა და მაღალი ხარისხის. გზა ევროკავშირისკენ სწორედ აქეთ მიდის, რომ საშვილიშვილოდ გარანტირებული იყოს საქართველოს დამოუკიდებლობა და არ ვიყოთ მარტო დარჩენილი მტრის პირისპირ, რასაც “ქართული ოცნება” ცდილობს.

ქვეყანას სჭირდება ერთიანობა. გაერთიანება მოხდება მაშინ, როდესაც ტყუილები დასრულდება, როდესაც დეზინფორმაციები დასრულდება, დაჭერები და ცემები დასრულდება და იქნება თანამშრომლობითი გარემო. მე მჯერა, რომ ამის შანსი გვაქვს.

საქართველოში დღეს არის დამოუკიდებლობის დროს დაბადებული თაობა და ამას ვეღარაფერი ვერ შეცვლის და საკმაოდ ღრმა ფესვები აქვს ჩვენს ბრძოლას თავისუფლებისთვის.

მთავარი ის არის, რომ ჩვენ შევძელით წინააღმდეგობის ხაზის შენარჩუნება, რომელიც ქვეყნის შიგნით და ქვეყნის გარეთ “ქართული ოცნების” არაღიარებას უზრუნველყოფს”, - განაცხადა გიორგი ვაშაძემ.