„ერთიანობა ნაციონალური მოძრაობის” წევრის, თემურ ჯანაშიას განცხადებით, დარწმუნებულია, რომ საბოლოოდ, მისი და საქართველოს მესამე პრეზიდენტის, მიხეილ სააკაშვილის უდანაშაულობა დამტკიცდება. როგორც ჯანაშიამ აღნიშნა, მიხეილ სააკაშვილის გამოცემულ განკარგულებებს სახელმწიფო და სპეციალური სამსახური ასრულებდა, რაც კრიმინალი არ არის.

„ეს საქმე წლების მანძილზე გრძელდება, უკვე ათეულს გადასცდა. ის, რომ აქ სისხლის სამართლის დანაშაულის ნიშნები არ არის, ყველასთვის გასაგებია. რაც შეეხება სასამართლოს მიერ მიღებულ გადაწყვეტილებას, ამდენი ყოყმანის შემდეგ ნაწილობრივ გამამტყუნებელი განაჩენი იქნა მიღებული, მაგრამ დარწმუნებული ვარ, საბოლოოდ დავამტკიცებ ჩემს უდანაშაულობას, ისევე როგორც დამტკიცდება პრეზიდენტ სააკაშვილის უდანაშაულობა. აქ ძალიან მარტივი „ქეისია“- პრეზიდენტი თავის უფლებამოსილების ფარგლებში გამოსცემდა განკარგულებებს, სახელმწიფო და სპეციალური სამსახური კი, ამ განკარგულებებს ასრულებდა, ამაში კრიმინალი არაფერია“, - განაცხადა თემურ ჯანაშიამ.

ცნობისთვის, თბილისის სააპელაციო სასამართლოში დღეს, საქართველოს მესამე პრეზიდენტის, მიხეილ სააკაშვილისა და სდსს-ს ყოფილი უფროსის, თემურ ჯანაშიას სასამართლო პროცესი გაიმართება, რომელიც დიდი ოდენობით საბიუჯეტო თანხების ჯგუფურად გაფლანგვას ეხება.

როგორც ცნობილია, თბილისის საქალაქო სასამართლომ დიდი ოდენობით საბიუჯეტო თანხების გაფლანგვის საქმეზე მესამე პრეზიდენტს, მიხეილ სააკაშვილს 9 წლით თავისუფლების აღკვეთა მიუსაჯა, სდსს-ს ყოფილ უფროსს, თეიმურაზ ჯანაშიას კი 300 ათას ლარიანი ჯარიმა დააკისრა.