ლოს-ანჯელესში საიმიგრაციო რეიდების საწინააღმდეგო საპროტესტო აქციები გრძელდება - მომიტინგეებმა ავტომობილები დაწვეს, პოლიციამ მათ დასაშლელად ცრემლსადენი გაზი და რეზინის ტყვიები გამოიყენა, დაკავებულია რამდენიმე ადამიანი
ლოს-ანჯელესში საიმიგრაციო და საბაჟო აღსრულების სამსახურის (ICE) მიერ ჩატარებული რეიდების წინააღმდეგ საპროტესტო აქციები და დემონსტრანტებსა და სამართალდამცავებს შორის შეტაკებები გრძელდება.
CNN-ის ინფორმაციით, ლოს-ანჯელესის პოლიციის დეპარტამენტმა ლოს-ანჯელესის მთელი ცენტრი უკანონო შეკრების ადგილად გამოცხადდა.
ლოს-ანჯელესის პოლიციის უფროსმა ჯიმ მაკდონელმა პრესკონფერენციაზე განაცხადა, რომ პოლიციასთან შეტაკებების დროს ათი მომიტინგე დააკავეს.
CNN-ი იუწყება, რომ მომიტინგეებმა სულ მცირე ორი ავტომობილი დაწვეს და პოლიციის ავტომობილებს სხვადასხვა საგნები დაუშინეს. კვირას პოლიციამ მომიტინგეების დასაშლელად ცრემლსადენი გაზი და რეზინის ტყვიები გამოიყენა.
ლოს-ანჯელესის პოლიციის დეპარტამენტის ცნობით, რამდენიმე ბიზნესმენმა მე-6 ქუჩისა და ბროდვეის მიდამოებში მათ მაღაზიებში ძარცვის შესახებ განაცხადა.
„პოლიციელები შემთხვევის ადგილისკენ მიემართებიან გამოსაძიებლად“, - განაცხადეს ლოს-ანჯელესის პოლიციის დეპარტამენტში.
შეგახსენებთ, ლოს-ანჯელესში აშშ-ის საიმიგრაციო და საბაჟო აღსრულების სამსახურის (ICE) მიერ ჩატარებული რეიდების წინააღმდეგ საპროტესტო აქციები რამდენიმე დღეა მიმდინარეობს. აშშ-ის პრეზიდენტმა, დონალდ ტრამპმა ლოს-ანჯელესში ეროვნული გვარდიის 2 000 ჯარისკაცის გაგზავნის ბრძანება გასცა. ტრამპის თქმით, მისი ადმინისტრაცია „რადიკალურ მემარცხენე საპროტესტო აქციებს, რომლებშიც ადამიანები ანაზღაურების სანაცვლოდ მონაწილეობენ, არ მოითმენს“. კალიფორნიის გუბერნატორი, გევინ ნიუსომი აშშ-ის პრეზიდენტ დონალდ ტრამპის გადაწყვეტილებას უკანონოდ მიიჩნევს და ამ ბრძანების გაუქმებას ითხოვს. მისი მტკიცებით, ტრამპის ქმედებები დიქტატორის ქმედებებია და არა პრეზიდენტის.
v-if="article.gallery" v-html="article.gallery"
