ახლა უკვე ლაპარაკია იმაზე, “ფეისბუქზე” რომ გამოთქვამ რაღაც მოსაზრებას, თურმე, მარიამ ლაშხის მსგავსი დეპუტატი, ამაზე გიჩივლებს. აშკარად დიქტატურაა ეს, ავტოკრატიის პირდაპირი დაკანონება მიმდინარეობს ქვეყანაში და ამ პირობებში ლაპარაკი, რომ მე ადგილობრივ არჩევნებში მივიღებ მონაწილეობას, სადაც არც დამკვირვებელია, აღარც სადამკვირვებლო მისიები არაა, აღარც უცხოელები აღარ ჩამოდიან იმისთვის, რომ შეაფასონ ეს პროცესი, როგორ შეიძლება აქედან რამე კარგი გამოვიდეს, - ამის შესახებ “კოალიცია ცვლილებისთვის” ერთ-ერთმა ლიდერმა ნუგზარ წიკლაურმა “პალიტრანიუსის” გადაცემა “360 გრადუსში” განაცხადა.

წიკლაურის თქმით, ახლა სასწორის პინაზე არ დგას საკითხი, რომელი ოპოზიციური პარტია უფრო მთავარი იქნება, არამედ სასწორის პინაზეა ქვეყნის თავისუფლება თუ მონობაში ყოფნა.

“თუ “ლელოს” სურს, რომ ბოიკოტი გამოუცხადოს იმ ფარსს, რომელსაც “ქართული ოცნება” “გვასაღებს”, როგორც დემოკრატიულ არჩევნებს, ამ შემთხვევაში, ჩვენზე დიდი მოკავშირე მას არ ეყოლება, თუ არა და მაშინ ჩვენ ვაპირებთ, ქართველი ხალხის დარწმუნებას, რომ ის არ მივიდეს ამ არჩევნებზე, განსაკუთრებით იმ პირობებში, როდესაც დაჭერილები არიან პოლიტიკური ლიდერები, დაჭერილია 50 პოლიტიკური პატიმარი, დღეს ვხედავთ, რომ ქუჩებში ხან ვის დახვდებიან და ხან ვის უჩივლებენ, სასამართლო ვეღარ იტევს უკვე, ყვარყვარე თუთაბერის ციხესავით გადაიქცა უკვე “ქართული ოცნების” სასამართლოც, ვეღარ იტევს, იმდენ ადამიანს ასამართლებენ უკვე სიმართლისთვის, თავისუფალი სიტყვისთვის. ახლა უკვე ლაპარაკია იმაზე, რომ “ფეისბუქზე” რომ გამოთქვამ რაღაც მოსაზრებას, თურმე, მარიამ ლაშხისნაირი დეპუტატი, ვიღაც, ამაზე გიჩივლებს. აშკარად დიქტატურაა ეს, ავტოკრატიის პირდაპირი დაკანონება მიმდინარეობს ქვეყანაში და ამ პირობებში ლაპარაკი იმაზე, რომ მე ადგილობრივ არჩევნებში მივიღებ მონაწილეობას, სადაც არც დამკვირვებელია, აღარც სადამკვირვებლო მისიები არაა, აღარც უცხოელები აღარ ჩამოდიან იმისთვის, რომ შეაფასონ ეს პროცესი, როგორ შეიძლება აქედან რამე კარგი გამოვიდეს.

მე მესმის, შეიძლება, ზოგიერთი პოლიტიკური პარტია თვლიდა, რომ მას აქვს მეტი რესურსი, მაგალითად, ფინანსური, აქვს მეტი წვდომა გარკვეულ სატელევიზიო საშუალებებზე და ახლა, ამ რაღაც ტიპის ტურბულენციაში, რომელშიც ჩვენ აღმოვჩნდით გაყალბებული არჩევნებისა და ირაკლი კობახიძის ანტი-ევროპული გზავნილების შემდეგ, უნდა, რომ ხელი მოითბოს და წარმოჩინდეს მთავარ ოპოზიციურ ძალად - არ გამოვა ეს ამბავი. ახლა სასწორის პინაზე ის კი არ დგას, “ლელო” იქნება უფრო მთავარი თუ “კოალიცია ცვლილებისთვის” ან რომელიმე პარტია, სასწორის პინაზე დგას, ეს ქვეყანა იქნება თავისუფალი ქვეყანა თუ იქნება დამონებული ისე, როგორც არის აზიურ დიქტატურებში ხალხი და “ფეისბუქს” გაუკონტროლებენ”, - განაცხადა ნუგზარ წიკლაურმა.