რეზოლუციებს არანაირი ფასი არ აქვს, გაჯერებულია ტყუილებით - ამის დაწერაში ჩვეულებრივად ფულს იხდიან, - ამის შესახებ „ქართული ოცნების“ გენერალურმა მდივანმა, თბილისის მერმა, კახა კალაძემ ევროპარლამენტის რეზოლუციაზე საუბრისას განაცხადა.

მისი თქმით, დღევანდელი ევროპა, ფაქტობრივად, დაცლილია სამართლიანობისგან და ძირითადი ფუნდამენტებისგან.

„აღნიშნულ რეზოლუციებს არანაირი ფასი არ აქვს. რეზოლუციები დაფუძნებულია ტყუილებზე, სიცრუეზე. ვიცით, როგორ იწერება ეს რეზოლუციები - ჩვეულებრივად ფულს იხდიან ამაში. გაჯერებულია ტყუილით. რა რეზოლუციაზეა საუბარი, როდესაც გეუბნებიან, რომ სააკაშვილი უნდა იყოს გათავისუფლებული. იგივე ქალბატონ მზია ამაღლობელთან დაკავშირებით. პირდაპირ ვნახეთ, თუ როგორ ურტყამს ხელს პოლიციელს და როგორი დანაშაული ჩაიდინა. ანუ, ეს საუბარი არის გაჯერებული ტყუილით. პირდაპირ გვეუბნებიან თეთრზე, რომ შავია. რა თქმა უნდა, ეს არის ძალიან მძიმე. ხალხი ამას ყველაფერს ხედავს. დღევანდელი ევროპა, ფაქტობრივად, დაცლილია იმ სამართლიანობისგან და ძირითადი ფუნდამენტებისგან, რაც ჩვენთვის არის მნიშვნელოვანი. ზოგადად ევროპული მომავალი არის სიტყვის და გამოხატვის თავისუფლებაზე, სამართლიანობაზე დაფუძნებული და დღევანდელი ევროპული ბიუროკრატია ამ ყველაფრისგან დაცლილია“, - განაცხადა კალაძემ.