ევროპარლამენტში ევროკომისიის პრეზიდენტისთვის, ურსულა ფონ დერ ლაიენისთვის უნდობლობის გამოცხადების წინადადებას მხარი 175-მა ევროპარლამენტარმა დაუჭირა, 360-მა ხმა მის წინააღმდეგ მისცა, ხოლო 18-მა თავი შეიკავა.

ევროპარლამენტში ევროკომისიის პრეზიდენტისთვის უნდობლობის გამოცხადებისთვის, ევროპარლამენტარების, სულ მცირე, ორი მესამედის ხმა იყო საჭირო.

შეგახსენებთ, ევროპარლამენტში ევროკომისიის პრეზიდენტისთვის, ურსულა ფონ დერ ლაიენისთვის უნდობლობის გამოცხადების წინადადება რუმინელმა ევროპარლამენტარმა ულტრამემარჯვენე პარტიიდან, „რუმინელთა გაერთიანების ალიანსიდან“, გეორგე პიპერეამ დააყენა.

რუმინელი ევროპარლამენტარი უნდობლობის გამოცხადებას ევროკომისიის მიერ ურსულა ფონ დერ ლაიენსა და Pfizer-ის აღმასრულებელ დირექტორს, ალბერტ ბურლას შორის COVID-19-ის საწინააღმდეგო ვაქცინების კონტრაქტებთან დაკავშირებული მიმოწერის გასაჯაროებაზე უარის თქმის გამო ითხოვდა.