გერმანიის მთავრობა არ ადასტურებს აშშ-ის პრეზიდენტის, დონალდ ტრამპის განცხადებას, რომ Patriot-ის ტიპის საზენიტო-სარაკეტო სისტემების პირველი პარტია უკვე გერმანიიდან უკრაინისკენ მიემართება, - ინფორმაციას უკრაინული მედია გამოცემა SRF-ზე დაყრდნობით ავრცელებს.

გამოცემის ცნობით, ქვეყნის თავდაცვის სამინისტროს პრესსპიკერმა განაცხადა, რომ გერმანიის მთავრობას ასეთი მიწოდების შესახებ ინფორმაცია არ აქვს.

„ვერ დავადასტურებ, რომ ამჟამად რაიმე გზაშია. ამის შესახებ არაფერი ვიცი“, - განაცხადა პრესსპიკერმა.

მისი თქმით, უკრაინის მხარდაჭერის საკითხზე „რამშტაინის“ ფორმატის შეხვედრა ორშაბათს ონლაინ რეჟიმში გაიმართება და მასზე Patriot-ის სისტემების უკრაინაში რაც შეიძლება სწრაფად მიწოდების გზებისა და საშუალებების ძიების საკითხს განიხილავენ.

შეგახსენებთ, აშშ-ის პრეზიდენტმა, დონალდ ტრამპმა გუშინ განაცხადა, რომ უკრაინისთვის განკუთვნილი Patriot-ის სისტემის რაკეტები უკვე გზაშია. „ისინი [რაკეტები] უკვე იგზავნება. ისინი გერმანიიდან მიდის“, - განაცხადა დონალდ ტრამპმა.