დონეცკის ოლქში „მალაიზიის ავიახაზების“ თვითმფრინავის ჩამოგდებაზე რუსეთის პასუხისმგებლობის საკითხი ეჭვგარეშეა, - ამის შესახებ ნიდერლანდების საგარეო საქმეთა მინისტრმა, კასპარ ველდკამპმა განაცხადა.

„მაშინაც კი, თუ ისინი ვერასდროს დაივიწყებენ, ისინი მშვიდობას იმსახურებენ. MH17-ის რეისის ჩამოგდებიდან თერთმეტი წლის შემდეგ, ეს მსხვერპლთა ახლობლებისთვის კვლავ აქტუალურია. დღეს, 298 ადამიანის, მათ შორის ნიდერლანდების 196 მოქალაქის ხსოვნას ვიგონებ“, - აცხადებს ნიდერლანდების საგარეო საქმეთა მინისტრი.

მისი თქმით, რუსეთის პასუხისმგებლობის საკითხი ადამინის უფლებათა ევროპულმა სასამართლომ და სამოქალაქო ავიაციის საერთაშორისო ორგანიზაციამ დაადგინეს.

შეგახსენებთ, 9 ივლისს ადამიანის უფლებათა ევროპულმა სასამართლომ უკრაინისა და ნიდერლანდების საჩივრების საფუძველზე რუსეთი 2022 წლის 24 თებერვლამდე და უკრაინაში სრულმასშტაბიანი ომის დროს ადამიანის უფლებების დარღვევებში დამნაშავედ ცნო, მათ შორის MH17-ის ჩამოგდების გამო.