ღაზაში შეტანილი ჰუმანიტარული დახმარება არსებულ საჭიროებებს ვერ აკმაყოფილებს, - ამის შესახებ გაერო-ს ადამიანის უფლებათა უმაღლესმა კომისარმა, ვოლკერ თურქმა განაცხადა.

„ისრაელი ღაზაში ჰუმანიტარული დახმარების შესვლას კვლავ მკაცრად ზღუდავს. ისრაელმა საკმარისი რაოდენობის ჰუმანიტარული დახმარების სწრაფი და შეუფერხებელი მიწოდება დაუყოვნებლივ უნდა უზრუნველყოს“, - განაცხადა ვოლკერ თურქმა.

მისი თქმით, ყველას მთავარი პრიორიტეტი ღაზაში ადამიანების სიცოცხლის გადარჩენა უნდა იყოს.

„მშვიდობიანი მოსახლეობისთვის საკვებზე წვდომის უფლების შეზღუდვა შესაძლოა ომის დანაშაულად და კაცობრიობის წინააღმდეგ ჩადენილ დანაშაულად ჩაითვალოს“, - აღნიშნა გაერო-ს უმაღლესმა კომისარმა.