მაშინ, როდესაც ტრამპის ადმინისტრაცია აძლიერებს ძალისხმევას უკრაინაში ომის დასრულებისთვის, ჩინეთი სამშვიდობო პროცესს საბოტაჟს უწევს, - ამის შესახებ პენტაგონის სადაზვერვო სააგენტოს ყოფილი სტრატეგიული ანალიტიკოსი რებეკა კოფლერი The Telegraph-ისთვის წერს. მისი თქმით, სი ძინპინი არ არის დაინტერესებული ომის დასრულებით - პირიქით, პეკინი ცდილობს მის რაც შეიძლება დიდხანს გახანგრძლივებას.

ანალიტიკოსების აზრით, ჩინეთი უკრაინას მარიონეტული ომის ნაწილად მიიჩნევს, რომელიც ორივე მთავარ მეტოქეს - მოსკოვსა და ვაშინგტონს - გამოფიტავს. მაშინ, როდესაც აშშ აფინანსებს უკრაინის თავდაცვას, ჩინეთი აძლიერებს მოსკოვს - ამარაგებს მიკროელექტრონიკით, ოპტიკურ სისტემებით, დრონების კომპონენტებით და ომისთვის კრიტიკულად მნიშვნელოვანი სხვა ორმაგი დანიშნულების ტექნოლოგიებით.

როგორც The Telegraph წერს, ეკონომიკური თანამშრომლობის საფარქვეშ, ჩინეთი ყოველწლიურად მილიონობით ბარელ რუსულ ნავთობსა და გაზს ყიდულობდა, ხშირად ჩრდილოვანი ფლოტის მეშვეობით, სანქციების გვერდის ავლით. მას შემდეგ, რაც ტრამპმა ინდოეთს რუსული ნავთობის იმპორტისთვის ახალი 25%-იანი ტარიფები დაუწესა, ჩინეთმა უცვლელად განაგრძო რესურსების შესყიდვები.

ექსპერტები პეკინის მხრიდან მოსკოვის მხარდაჭერაში სტრატეგიულ გათვლას ხედავენ: გაჭიანურებული კონფლიქტი ჩინეთს საშუალებას აძლევს, შეამციროს ამერიკული იარაღის მარაგი და შეამციროს აშშ-ს მზადყოფნა ტაივანში პოტენციური შეჭრის წინააღმდეგ საბრძოლველად.

„სანამ ორი ვეფხვი ხეობაში იბრძვის, ბრძენი მაიმუნი მთაზე ზის და მათ უყურებს“, - წერს ავტორი სი ძინპინის ტაქტიკაზე, ჩინურ ალეგორიაზე დაყრდნობით.