დამალვა არ მიცდია, პოლიციას ჩავბარდი, - ამის შესახებ მეუღლის, ალინა კალოიანის დამამძიმებელ გარემოებებში ჩადენილი განზრახ მკვლელობის ფაქტზე ბრალდებულმა ნიკოლოზ ქრისტესიაშვილმა სასამართლო პროცესზე განაცხადა.

მან მცირე რეპლიკით ისარგებლა და განაცხადა, რომ მისი მცირეწლოვანი შვილები მკვლელობას არ შესწრებიან.

„ერთადერთი არ ვეთანხმები, რომ ბავშვმა ნახა ესო. მას ეძინა, წუთი წუთზე ჩემი ცოლის ძმა უნდა მოსულიყო, აღელვებულ მდგომარეობაში ვიყავი და ვერ დავხვდებოდი მას. დამალვა არ მიცდია, პოლიციას ჩავბარდი“, - განაცხადა ბრალდებულმა.

აღნიშნულს პროკურორმა ლევან ვეფხვაძემ უპასუხა და განაცხადა, რომ ეს ფაქტი დადასტურებული რომ იყოს, ბრალშიც იქნებოდა ასახული, ამიტომ ეს საკითხი გამოსაძიებელია.

ცნობისთვის, ნიკოლოზ ქრისტესიაშვილს ბრალდება საქართველოს სისხლის სამართლის კოდექსის 11 პრიმა 109-ე მუხლის „კ“ და „მ“ ქვეპუნქტებით (განზრახ მკვლელობა, ჩადენილი ოჯახის წევრის მიმართ, განსაკუთრებული სისასტიკით) წარედგინა, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.

გამოძიების ინფორმაციით, 25 აგვისტოს, თბილისში, ზემო ფონიჭალის დასახლებაში, ბრალდებულმა მეუღლეს, განსაკუთრებული სისასტიკით, ბლაგვი საგნით და დანით სხეულის სხვადასხვა არეში მრავლობითი დაზიანებები მიაყენა. მიღებული დაზიანებების შედეგად დაზარალებული ადგილზე გარდაიცვალა.