დანიის საგარეო საქმეთა მინისტრმა კოპენჰაგენში აშშ-ის საელჩოს უმაღლესი რანგის დიპლომატი უწყებაში დაიბარა, - ინფორმაციას Reuters-ი ავრცელებს.

გამოცემის ცნობით, დიპლომატის დაბარება უკავშირდება ცნობებს იმის შესახებ, რომ აშშ-ის მოქალაქეები გრენლანდიაში გავლენის მოხდენის ოპერაციებს ახორციელებენ.

როგორც ადგილობრივი მედია ანონიმურ წყაროებზე დაყრდნობით იუწყება, დანიის მთავრობა მიიჩნევს, რომ დანიის ტერიტორიაზე ფარული გავლენის ოპერაციებში ტრამპის ადმინისტრაციასთან დაკავშირებული აშშ-ის სულ მცირე სამი მოქალაქე მონაწილეობდა.

„სამეფოს შიდა საქმეებში ჩარევის ნებისმიერი მცდელობა, რა თქმა უნდა, მიუღებელია. ამ ფონზე, ვთხოვე საგარეო საქმეთა სამინისტროს, რომ ამერიკის საქმეთა რწმუნებული (დიპლომატი) სასაუბროდ დაიბაროს“, - განაცხადა დანიის საგარეო საქმეთა მინისტრმა, ლარს ლოკე რასმუსენმა ადგილობრივ მედიასთან საუბარში.

შეგახსენებთ, აშშ-ის პრეზიდენტმა დონალდ ტრამპმა განაცხადა, რომ სურს, რომ შეერთებულმა შტატებმა ეროვნული და საერთაშორისო უსაფრთხოების მიზნით გრენლანდიაზე კონტროლი დააწესოს.