13 სექტემბერს, 19:00 საათზე თბილისის სახელმწიფო უნივერსიტეტთან გელოდებით, ღრმად ვარ დარწმუნებული, რომ ბევრი ვიქნებით. ბრძოლა ბოლომდე, აუცილებლად გავიმარჯვებთ, - ამის შესახებ „კოალიცია ცვლილებისთვის“ ერთ-ერთმა წევრმა, თენგო თევზაძემ რუსთაველის გამზირზე გამართულ ბრიფინგზე პარტიის სახელით განაცხადა.

თენგო თევზაძის მტკიცებით, „ქართულმა ოცნებამ“ გადაწყვიტა, რომ საქართველოს უვიზო მიმოსვლა დააკარგვინოს.

„ანტიქართულმა რეჟიმმა, რომელიც თავს „ქართულ ოცნებას“ უწოდებს, გადაწყვიტა დაგვაკარგვინოს უვიზო მიმოსვლა ევროკავშირთან. ჩვენ, რომლებიც არ ვთანამშრომლობთ რეჟიმთან, არ გავურიგდით რეჟიმს, ვართ წინააღმდეგობაში და გვაქვს კონკრეტული გეგმა, როგორ ჩამოვშალოთ რეჟიმი, ვიკრიბებით 13 სექტემბერს თბილისის სახელმწიფო უნივერსიტეტთან.

უვიზო მიმოსვლა თითოეული საქართველოს მოქალაქისთვის უმნიშვნელოვანესია, ეს არის ხელმისაწვდომი განათლება, ჯანდაცვა, ეს არის ბედნიერი ქართული ოჯახი. ევროკავშირი და ევროპა საქართველოსთვის არის ქრისტიანული ცივილიზაცია. „ქართულმა ოცნებამ“ დემოკრატიისთვის და თავისუფლებისთვის არცერთ პირობა არ შეასრულა, რომელიც 31 დეკემბრამდე მოგვცეს“, - განაცხადა თენგო თევზაძემ.