სავსე ვარ მწუხარებითა და ბრაზით იუტას შტატში, კოლეჯის კამპუსში ჩარლი კირკის საზარელი მკვლელობის გამო, - ამის შესახებ აშშ-ის პრეზიდენტმა, დონალდ ტრამპმა ვიდეო მიმართვაში განაცხადა.

„ჩარლიმ მილიონობით ადამიანი შთააგონა და დღეს ყველას, ვინც მას იცნობდა და უყვარდა, შოკი და საშინელება აერთიანებს. ბნელი მომენტია ამერიკისთვის“, - აღნიშნა ტრამპმა.

მისი თქმით, კირკი „სიმართლისა და თავისუფლებისთვის მოწამედ“ იქცა. აშშ-ის პრეზიდენტმა კირკის დაღუპვა დაუკავშირა ფაქტს, როდესაც მას პენსილვანიის შტატის ქალაქ ბატლერში ესროლეს და ძალადობის სხვა გახმაურებულ შემთხვევებს.

დონალდ ტრამპის თქმით, ამერიკელებმა და მედიამ უნდა „შეხედონ იმ ფაქტს, რომ ძალადობა და მკვლელობა იმ ადამიანების დემონიზაციის ტრაგიკული შედეგია, ვისაც არ ეთანხმები“.

აშშ-ის პრეზიდენტმა პოლიტიკური ძალადობის წინააღმდეგ ბრძოლის ფართო გეგმა წარმოადგინა.

„ჩემი ადმინისტრაცია იპოვის ყველას და თითოეულ მათგანს, ვინც წვლილი შეიტანა ამ სისასტიკეში და სხვა პოლიტიკურ ძალადობაში, მათ შორის ორგანიზაციებს, რომლებიც აფინანსებენ და მხარს უჭერენ მას, ასევე მათ, ვინც დევნის ჩვენს მოსამართლეებს, სამართალდამცავ ორგანოებს და ყველას, ვინც წესრიგს ამყარებს ჩვენს ქვეყანაში“, - განაცხადა დონალდ ტრამპმა.

"Turning Point USA“-ს დამფუძნებელი, კონსერვატორი აქტივისტი, ჩარლი კირკი იუტას ველის უნივერსიტეტში გამართულ ღონისძიებაზე სროლის შედეგად გარდაიცვალა. აქტივისტი პრეზენტაციას ატარებდა, როცა ესროლეს.