ხოშტარიას დაკავება ივანიშვილის რეჟიმის მხრიდან ორმაგი სტანდარტის კიდევ ერთი უტიფარი მაგალითია , - ასე ეხმაურება პარტია „ფედერალისტების“ თავმჯდომარე, გიგა ბოკერია, „დროას“ ლიდერის, ელენე ხოშტარიას დაკავებას.

მისი თქმით, ეს არის ივანიშვილის „არაკონსტიტუციური რეჟიმის“ მხრიდან ორმაგი სტანდარტის კიდევ ერთი „უტიფარი მაგალითი“.

"წლების განმავლობაში ივანიშვილის რეჟიმი პირდაპირ თუ ირიბად აორგანიზებდა არა უბრალოდ სიმბოლურ პროტესტს და დაზიანებას ოპონენტების ბანერების თუ ოფისების გარე სახის, არამედ ძალადობრივ თავდასხმებს და ამისთვის არავინ ისჯებოდა. უამრავი მასალა არსებობს ამაზე და მაქსიმუმ ადმინისტრაციული წესით დაესაჯათ ვინმე და ეს იყო სტანდარტი.

მეგი დიასამიძის შემთხვევაში ეს ყველაფერი აიყვანეს სისხლის სამართლებრივ დევნაში, რადგან მათ წინააღმდეგ იყო მიმართული და ახლა ელენე ხოშტარიას შემთხვევაშიც იმავეს აკეთებენ.

ეს არის ორმაგი სტანდარტის კიდევ ერთი უტიფარი მაგალითი ამ არალეგიტიმური, ანტიკონსტიტუციური რეჟიმის მხრიდან", - აცხადებს გიგა ბოკერია.