„გახარია საქართველოსთვის“ ერთ-ერთი ლიდერი, გიორგი შარაშიძე ამბობს, რომ სოფელ გურიანთას საბავშვო ბაღი, რომლის მშენებლობაც გასულ წელს უნდა დასრულებულიყო, დღემდე არ არის დასრულებული.

როგორც ის სოციალურ ქსელში წერს, საბავშვო ბაღის მშენებლობა კომპანია „ლაგი კაპიტალის“ პროექტია, რომელიც არსებული ინფორმაციით „ქართული ოცნების“ დეპუტატის, ირაკლი ზარქუას ოჯახს ეკუთვნის და რომლის ხელმძღვანელები სახელმწიფოს კუთვნილი 9 მილიონ ლარზე მეტი თანხის თაღლითურად დაუფლებისა და უკანონო შემოსავლების ლეგალიზაციის ბრალდებით გუშინ დააკავეს.

ის საბავშვო ბაღის მშენებლობაზე საუბრისას 2024 წელს მათ მიერვე გავრცელებულ ვიდეოს კიდევ ერთხელ ავრცელებს და ამბობს, რომ პარტიის წევრები ამ თემაზე, ჯერ კიდევ გასულ წელს საუბრობდნენ.

„ეს ვიდეო ზუსტად ერთი წლის წინ, საპარლამენტო არჩევნების კამპანიის ფარგლებში ოზურგეთში ჩავწერეთ. ეს სწორედ ირაკლი ზარქუას ოჯახის წევრის კომპანიის “ლაგი კაპიტალის” შეუსრულებელი პროექტია, რომელმაც მილიონ ლარზე მეტი ავანსად მიიღო, თანხა სრულად გაფლანგა, სოფელ გურიანთას საბავშვო ბაღი კი დღემდე არ აქვს! რატომ არ მოახდინა შარშან „ოცნებამ“ რეაგირება? როგორ მოხდა საბავშვო ბაღის რეაბილიტაციისთვის გამოყოფილი თანხის, მილიონ ლარზე მეტის სრულად ავანსად ჩარიცხვა? იყო თუ არა შესაძლებელი ასეთ უკანონობაზე ხელის დაფარება მფარველის, ირაკლი ზარქუას გარეშე? და რაც მთავარია, რას ნიშნავს კომპანიის გაყიდვა მას შემდეგ, რაც სახელმწიფოსგან მილიონობით ლარი აქვს მითვისებული და გაფლანგული? ეს ფაქტი ადასტურებს, რომ ამ დანაშაულზე სრული პასუხისმგებლობა “ლაგი კაპიტალს” და მის თავდაპირველ დამფუძნებელს ანუ ირაკლი ზარქუას ოჯახის წევრს ეკისრება!“- წერს გიორგი შარაშიძე სოციალურ ქსელში.

შეგახსენებთ, საქართველოს ფინანსთა სამინისტროს საგამოძიებო სამსახურმა საქართველოს რეგიონებში სკოლებისა და ბაღების მშენებელი კომპანია „ლაგი კაპიტალის“ ხელმძღვანელები სახელმწიფოს კუთვნილი 9 მილიონ ლარზე მეტი თანხის თაღლითურად დაუფლებისა და უკანონო შემოსავლების ლეგალიზაციის ბრალდებით დააკავა. მოგვიანებით, ერთ-ერთი მედიასაშუალების მიერ გავრცელდა ინფორმაცია რომ „ქართული ოცნების“ დეპუტატის ირაკლი ზარქუას სიძე, ალექსანდრე ამისულაშვილი წლების წინ „ლაგი კაპიტალს“ ფლობდა.