ჭირისგან ქვეყნის გასათავისუფლებლად ერთადერთი გზაა დარჩენილი - ახალი, ნდობით აღჭურვილი, უანგარო და ეროვნულ-დემოკრატიული იდეებით გამსჭვალული ადამიანების ერთობით ჩამოყალიბებული პოლიტიკური სივრცის შექმნა, რაც დროულად დაასრულებს რუსულ რეჟიმს, - ამის შესახებ ნათქვამია ოპოზიციონერი პოლიტიკოსის არმაზ ახვლედიანის განცხადებაში, რომელსაც ის სოციალურ ქსელში ავრცელებს.

არმაზ ახვლედიანის თქმით, ივანიშვილ-კობახიძის „რუსული კრიმინალური რეჟიმის ცამეტი წელი ერთი დიდი, სამარცხვინო, დანაშაულებრივი ლაქაა“ საქართველოს თანამედროვე ისტორიაში.

„დიდი იმედების უდიდეს იმედგაცრუებად გადაქცევის, ქვეყნის ნორმალურობის პერსპექტივის დასამარების, ილიასა და მერაბ კოსტავას გზის ღალატის, იდენტიფიცირებული მტრის, რუსეთის, იმპერიალისტური გეგმების მზაკვრულად რეალიზების, გაუგონარი შიშის, მოსყიდვის, ტერორის ატმოსფეროსა და პოლიტპატიმრების მთელი კლასის შექმნის, ფსევდო ფასეულობებზე აპელირების, ყველა, მეტ-ნაკლებად, დამოუკიდებელი ინსტიტუციის დამორჩილების, სამხრეთ კავკასიაში კუთვნილი უმნიშვნელოვანესი როლის დაკარგვის, უსაფრთხოების გარანტიების გაუქმების, აღვირახსნილი სოციალური უსამართლობის, გაუგონარი მასშტაბის კორუფციის, უცხოეთში გადახვეწილი ათი ათასობით თანამემამულის, გაუქმებული არჩევნებისა და დემოკრატიის, დატერორებული საჯარო მოხელეების, ბინძურ პოლიტიკურ კონიუნქტურას დაქვემდებარებული განათლებისა და კულტურის სფეროს შექმნის, აშშ-სა და ევროპაში მთავარ პარტნიორებთან ათწლეულობით ნაშენები სანდო ხიდების დაწვის, სოხუმსა და ცხინვალთან შერიგების პროცესის გაყინვის, ნარკომანიის, ამ უდიდესი ეროვნული კატასტროფის, აღზევების, სუს-ს, შსს-ს, პროკურატურის და ყველა სხვა სახელმწიფო უწყების შავრაზმული პარტიული დღის წესრიგისთვის დაქვემდებარების, კულტურული მემკვიდრეობის, თბილისის, ბათუმის, ბახმაროს და სხვა მარგალიტების გაპარტახების, გამოუსწორებლად დაზიანების, სამოქალაქო სექტორისა და დამოუკიდებელი მედიის უმთავრეს მტრად გამოცხადების და სხვა ათასი უბედურების შემოქმედი, ივანიშვილ-კობახიძის რუსული კრიმინალური რეჟიმის ცამეტე წელი ერთი დიდი, სამარცხვინო, დანაშაულებრივი ლაქაა საქართველოს თანამედროვე ისტორიაში.

ახლა ამ ჭირისგან ქვეყნის გასათავისუფლებლად ერთადერთი გზაა დარჩენილი - ახალი, ნდობით აღჭურვილი, უანგარო და ეროვნულ-დემოკრატიული იდეებით გამსჭვალული ადამიანების ერთობით ჩამოყალიბებული პოლიტიკური სივრცის შექმნა, რაც დროულად დაასრულებს რუსულ რეჟიმს და ჩააყენებს საქართველოს ნორმალური, წარმატებული ევროპული განვითარების უალტერნატივო კალაპოტში“, - წერს ახვლედიანი.