ზვიად კუპრავა მიიჩნევს, რომ არის უკანონო პატიმარი, ის ბრძოლას ბოლომდე აპირებს,- ამის შესახებ ადვოკატმა გია გოროზიამ მისი დაცვის ქვეშ მყოფის, “ნაციონალური მოძრაობის” წევრ ზვიად კუპრავას დაკავების შესახებ ჟურნალისტებს განუცხადა.

აღნიშნული განცხადება ადვოკატმა მედიასთან სუს-ში შესვლამდე გააკეთა, სადაც იმყოფება დაკავებული ზვიად კუპრავა. ადვოკატის ინფორმაციით, კუპრავას ბრალს სუს-ში უახლოეს წუთებში წარუდგენენ.

„გუშინ, გვიან ღამით შევხვდი ზვიადს პირადად, ვისაუბრეთ. მიიჩნევს, რომ არის უკანონო პატიმარი, ბრძოლას ბოლომდე აპირებს, ვინაიდან მისი დაკავება იყო სრულად უსაფუძვლო. ბატონი ზვიადის პოზიციას, როცა გამოვალ [სუს-იდან], მოგახსენებთ.

ზვიად კუპრავას დაკავება მოხდა ისე, რომ თითქოს მან საზოგადოების გარკვეულ ფენას მოუწოდა, რომ ძალადობით ან დამხობით შეცვლილიყო სახელმწიფო, კონსტიტუციური წესწყობილება. მე პირადად ვნახე ეს ვიდეო-ჩანაწერი, რომელიც სოციალურ ქსელში ატვირთული იქნა თავად ზვიად კუპრავას მიერ. მსგავსი მოწოდება, რომ ძალადობით ან რაიმე სხვა ძალადობრივი ქმედებით დაემხოს სახელმწიფო წყობილება, პირადად ვერ მოვისმინე”,- განაცხადა გია გოროზიამ.

ცნობისთვის, სუს-მა თბილისის საკრებულოში „ნაციონალური მოძრაობის“ დეპუტატი ზვიად კუპრავა დააკავა. დაკავება ეხება 30 სექტემბერს, კუპრავას მიერ, სოციალურ ქსელში გაკეთებულ განცხადებას. კერძოდ, სუს-ის განმარტებით, გამოძიების მასალების მიხედვით, 2025 წლის 30 სექტემბერს ზვიად კუპრავამ სოციალურ ქსელში განათავსა ვიდეო, სადაც მან მოქალაქეებს მოუწოდა 4 ოქტომბრის არჩევნების ჩაშლისა და სახელმწიფო ხელისუფლების გადატრიალებისკენ.