სტუდენტები, რომლებიც თსუ-ს პირველი კორპუსიდან თავისუფლების მოედნამდე საპროტესტო მსვლელობას მართავენ, „ქართული ოცნების“ მერობის კანდიდატის, კახა კალაძის საარჩევნო შტაბთან ცოტა ხნით გაჩერდნენ.

მათი თქმით, დღევანდელ არჩევნებზე რა ციფრებიც არ უნდა დაიწეროს, ყველა არის ტყუილი.

სტუდენტები მსვლელობისას სკანდირებენ: “რევოლუცია, რევოლუცია”.

„რაც არ უნდა დაწერონ, რომ ამდენი მოვიდა არჩევნებზე და „ქართულ ოცნებას” მისცა ხმაო, ყველა რიცხვი არის ტყუილი და ამ ტყუილს ბოლო მოეღება დღეს. კახა კალაძე არის მთავარი კრიმინალი ამ ქალაქის.

დღეს ჩვენი მოვალეობაა ამათი ტყუილებისგან და პროპაგანდისგან გათავისუფლება. გვინდა, რომ ყველას სჯეროდეს გამარჯვების. მოდიან სხვა ქალაქებიდან, მოდიან ემიგრანტები და თავს მოიყრიან რუსთაველის გამზირზე“, - განაცხადეს სტუდენტებმა.

სტუდენტების თქმით, მათი გასათავისუფლებლები არიან „ის სტუდენტები და უდანაშაულო ადამიანები, რომელიც „ქართულმა ოცნებამ” ციხეში გამოკეტა“.