რუსეთის პრეზიდენტის პრესსპიკერის, დიმიტრი პესკოვის განცხადებით, რუსეთის პრეზიდენტ ვლადიმერ პუტინსა და აშშ-ის პრეზიდენტ დონალდ ტრამპს შორის შეხვედრის მომზადებაზე მუშაობა რთული პროცესი იქნება.

„განწყობა სამუშაოა. წინ რთული სამუშაო გველის“, - განუცხადა პესკოვმა ჟურნალისტებს.

ამასთან, მისი თქმით, ვლადიმერ პუტინსა და აშშ-ის პრეზიდენტ დონალდ ტრამპს შორის შეხვედრის ზუსტი თარიღის შესახებ ინფორმაცია ამ დროისთვის არ არსებობს.

„მოისმინეთ როგორც ამერიკული, ასევე ჩვენი მხარის განცხადება, რომ ამას შეიძლება დრო დასჭირდეს. ზუსტი ვადები თავიდანვე არ ყოფილა დადგენილი“, - განუცხადა პესკოვმა ჟურნალისტებს.

მან ევროპის ქვეყნები რუსეთ-უკრაინის ომის გახანგრძლივების ხელშეწყობაში კიდევ ერთხელ დაადანაშაულა.

„ამჟამად ევროპელები არ არიან მშვიდობის მომხრეები და არ წარმოადგენენ ძალას, რომელიც ხელს უწყობს მშვიდობის დამყარებას პოლიტიკური და დიპლომატიური კონტაქტების გზით. პირიქით, ევროპელები, ყველანაირად აქეზებენ კიევის რეჟიმს ომის გასაგრძელებლად“, - განუცხადა პესკოვმა ჟურნალისტებს.