ევროკავშირის ლიდერები შეთანხმდნენ, რომ ხელი შეუწყონ უკრაინის ფინანსური საჭიროებების დაკმაყოფილებას მომდევნო ორი წლის განმავლობაში, თუმცა ვერ დაამტკიცეს გეგმა კიევისთვის გამოყოფილი სესხის დასაფინანსებლად გაყინული რუსული აქტივების გამოყენებასთან დაკავშირებით.

Reuters-ის ინფორმაციით, გადაწყვეტილების მიღებას ბელგიის მხრიდან გამოთქმულმა შეშფოთებამ შეუშალა ხელი. სააგენტო განმარტავს, რომ ბელგიის პოზიცია გადამწყვეტი მნიშვნელობის იყო, რადგან 140 მილიარდი ევროს ოდენობის სესხის დასაფინანსებლად გამოსაყენებელი აქტივები ბელგიურ ფინანსურ ინსტიტუტში, Euroclear-ში, ინახება.

ევროკავშირის წევრი სახელმწიფოების ბევრ მთავრობას იმედი ჰქონდა, რომ ბრიუსელში სამიტზე შეხვედრისას ლიდერები კონცეფციას დადებითად შეაფასებდნენ და ევროკავშირის აღმასრულებელ ორგანოს, ევროკომისიას, მომდევნო კვირებში ოფიციალური სამართლებრივი წინადადების წარდგენას სთხოვდნენ.

Reuters-ი წერს, რომ სამიტის შემდეგ გამოქვეყნებული დეკლარაციის ტექსტი წინა პროექტებისგან შერბილებულია და კომისიას სთხოვს „ფინანსური მხარდაჭერის ვარიანტებს უკრაინის ფინანსური საჭიროებების შეფასების საფუძველზე“.

„რუსეთის აქტივები უნდა დარჩეს უძრავად მანამ, სანამ რუსეთი უკრაინის წინააღმდეგ აგრესიის ომს არ შეწყვეტს და ომით მიყენებულ ზარალს არ აუნაზღაურებს“, - ნათქვამია დეკლარაციაში.

ევროკავშირის ლიდერები საკითხს დეკემბერში დაუბრუნდებიან.