ჩეხეთის პრემიერ-მინისტრის, ანდრეი ბაბიშის განცხადებით, რუსეთის გაყინული აქტივების გამოყენება რუსეთ-უკრაინის ომის დასრულების შემდეგ უნდა მოხდეს.

ბაბიშმა ხაზგასმით აღნიშნა, რომ ჩეხეთმა მიიღო გადაწყვეტილება, არ დაკისრებოდა პასუხისმგებლობა უკრაინისთვის 90 მილიარდი ევროს ოდენობის ერთობლივი სესხის გამოყოფასთან დაკავშირებით.

„მიმაჩნია, რომ ეს თანხა ომის დასრულების შემდეგ უნდა გამოიყენონ. უცნაურად მიმაჩნია, რომ დღეს, ორი წლით ადრე ვაძლევთ ფულს, როდესაც გამოცხადდა, რომ სამშვიდობო შეთანხმება ახლოვდება. რაღაც ერთმანეთთან თანხვედრაში არ არის“, - აღნიშნა ბაბიშმა.

შეგახსენებთ, ევროკავშირის ლიდერები ევროპული საბჭოს სხდომაზე უკრაინისთვის რეპარაციის სესხის გამოყოფაზე ვერ შეთანხმდნენ, თუმცა მიიღეს გადაწყვეტილება, რომ ქვეყანას, ევროკავშირის კაპიტალის ბაზრებზე სესხის აღების გზით, 2026-2027 წლებში 90 მილიარდი ევროს ოდენობის დაფინანსებას გამოუყოფენ. რეპარაციის სესხის მსგავსად, ძალიან მნიშვნელოვანია, რომ უკრაინა სესხს მხოლოდ რეპარაციების მიღების შემდეგ დაფარავს. დაფინანსებაში მონაწილეობას არ მიიღებენ უნგრეთი, სლოვაკეთი და ჩეხეთი.