უკრაინელი პოლიტიკოსი და პარტია „ბატკივშინას“ ლიდერი იულია ტიმოშენკო პარტიის ოფისში ჩხრეკის ჩატარების ფაქტს ადასტურებს.

„ახლახან „ბატკივშინას“ პარტიის ოფისში ე.წ. სასწრაფო საგამოძიებო მოქმედებები დასრულდა, რომელიც მთელი ღამის განმავლობაში მიმდინარეობდა და კანონთან საერთო არაფერი აქვს. ოცდაათზე მეტმა შეიარაღებულმა პირმა, ყოველგვარი დოკუმენტაციის წარდგენის გარეშე, შენობა დაიკავა და თანამშრომლები ფაქტობრივად მძევლად აიყვანა“, - წერს ტიმოშენკო „ფეისბუქის“ პირად გვერდზე.

მისი თქმით, ჩხრეკა სასამართლოს ბრძანების გარეშე ჩატარდა და ანტიკორუფციული სააგენტოების თანამშრომლებმა „ვერაფერი იპოვეს“.

„ყველა აბსურდულ ბრალდებას კატეგორიულად უარვყოფ. როგორც ჩანს, არჩევნები გაცილებით ახლოსაა, ვიდრე აქამდე გვეგონა. ვიღაცამ კონკურენტების მოშორება გადაწყვიტა“, - წერს ტიმოშენკო.

ცნობისთვის, გუშინ საღამოს უკრაინულმა მედიამ ინფორმაცია გაავრცელა, რომ უკრაინის ანტიკორუფციულმა ბიურომ და სპეციალურმა ანტიკორუფციულმა პროკურატურამ კორუფციის ბრალდებით იულია ტიმოშენკოს პარტიის ოფისში ჩხრეკა ჩაატარა.

ანტიკორუფციულ სააგენტოებში განაცხადეს, რომ ერთ-ერთი საპარლამენტო ფრაქციის ლიდერი კონკრეტული კანონპროექტების მხარდასაჭერად ან მათ წინააღმდეგ ხმის მისაცემად, დეპუტატებს ქრთამს სთავაზობდა.

ადგილობრივი მედია უკრაინის სპეციალური ანტიკორუფციული პროკურატურის პრესსპიკერზე, ოლგა პოსტოლიუკზე დაყრდნობით წერს, რომ სააგენტომ ტიმოშენკოს ეჭვის შესახებ უკრაინის სისხლის სამართლის კოდექსის 369-ე მუხლის მე-4 ნაწილის შესაბამისად აცნობა.