არ ვიცი, ახლა, თვითშეფასება ძალიან კარგი და მაღალიც მაქვს შეიძლება, მაგრამ ასი ათასი კაცი გამოვიყვანო და ეს რომ ვთქვა ჩემი პირით, ვიქნებოდი თვითმარქვია. ის აქცია არ იყო ჩემი ორგანიზებული, - ამის შესახებ 4 ოქტომბრის აქციის საქმეზე ბრალდებულმა, „სტრატეგია აღმაშენებლის“ ერთ-ერთმა ლიდერმა პაატა მანჯგალაძემ სასამართლო პროცესზე განაცხადა.

მისი განმარტებით, პროკურორმა დაასახელა, რომ გათავისუფლების შემთხვევაში ბრალდებულების მხრიდან არსებობს მიმალვის, მოწმეზე ზემოქმედების და მტკიცებულებების განადგურების საფრთხეები. მანჯგალაძის თქმით, მისი მხრიდან არცერთი აღნიშნული საფრთხე არ არსებობს, მითუმეტეს მიმალვის, რადგანაც პოლიციას თავად ჩაბარდა.

„მტკიცებულებების განადგურებას რაც შეეხება, ათასზე მეტი ჩემი განცხადება დევს „ინტერპრესზე“, ათასზე მეტი! განცხადებები ნეგატიურ აზრს გამოხატავსო და მე რომ პოზიტიურ განცხადებებს ვაკეთებდე ვიქნებოდი, იქ, სადაც ახლა პროკურორი ზის და პროკურორი შეიძლება აქ ყოფილიყო. არანაირი მტკიცებულება არ აქვთ.

რაც შეეხება იმას, რომ დანაშაული ჩავიდინე, მე რომ ვამტკიცებდე, ასი ათასიანი მიტინგის ორგანიზატორობა შემიძლია, თვითმარქვია გამოვალ. როგორ შეიძლება უკვე შეკრება დაწყებული აქციის ორგანიზატორობა. წინაზეც ვთქვი, მართლა გამიხარდებოდა პაატა მანჯგალაძეს ერთი დაძახებით შემეძლოს ასი ათასი კაცის ქუჩაში გამოყვანა. არ ვიცი, ახლა, თვითშეფასება ძალიან კარგი და მაღალიც მაქვს შეიძლება, მაგრამ ასი ათასი კაცი გამოვიყვანო და ეს რომ ვთქვა ჩემი პირით, ვიქნებოდი თვითმარქვია. ის აქცია არ იყო ჩემი ორგანიზებული“, - განაცხადა პაატა მანჯგალაძემ.