აშშ-ის პრეზიდენტის დონალდ ტრამპის განცხადებით, აშშ-მა და ირანმა ომანში ძალიან კარგი მოლაპარაკებები გამართეს და ირანის პოზიცია ბირთვულ შეთანხმებასთან დაკავშირებით უფრო ხელსაყრელია, ვიდრე გასული წლის ივნისის 12-დღიანი ომის წინ იყო.

„ირანთან დაკავშირებით ძალიან კარგი მოლაპარაკებები გვქონდა. როგორც ჩანს, ირანს ძალიან სურს შეთანხმების დადება, მაგრამ უნდა ვნახოთ, რა იქნება ეს შეთანხმება“, - განუცხადა ტრამპმა ჟურნალისტებს.

შეგახსენებთ, ეს მოლაპარაკებები იყო პირველი პირისპირ მოლაპარაკებები აშშ-სა და ირანს შორის გასული წლის ივნისის 12-დღიანი ომის შემდეგ. ომანის დედაქალაქ მასკატში ირანის საგარეო საქმეთა მინისტრ აბას არაღჩს, დონალდ ტრამპის წარმომადგენელ სტივ უიტკოფსა და აშშ-ის პრეზიდენტის სიძეს, ჯარედ კუშნერს შორის ომანის საგარეო საქმეთა მინისტრ ბადრ ალ-ბუსაიდის შუამავლობით გამართილი შეხვედრა თითქმის რვა საათს გაგრძელდა. მოლაპარაკებების დასაწყისში მხარეები ომანის საგარეო საქმეთა მინისტრს ცალ-ცალკე შეხვდნენ. იმავე დღეს, უიტკოფმა და კუშნერმა არაღჩისთან პირდაპირი მოლაპარაკებებიც გამართეს.