უკრაინის თავდაცვის მინისტრმა მიხაილ ფედოროვმა და საფრანგეთის შეიარაღებული ძალების მინისტრმა კატრინ ვოტრენმა ხელი მოაწერეს წერილს ორ ქვეყანაში იარაღის ერთობლივი წარმოების განზრახვის შესახებ , - ინფორმაციას უკრაინული მედია ავრცელებს.

უკრაინის თავდაცვის მინისტრის განცხადებით, ეს გზას უხსნის უკრაინასა და საფრანგეთს შორის თავდაცვის ინდუსტრიაში მასშტაბური ერთობლივი პროექტების განხორციელებას.

კერძოდ, ორი ქვეყნის მთავრობები და თავდაცვის კომპანიები ყურადღებას გაამახვილებენ ინოვაციური რადიოელექტრონული საბრძოლო სისტემების შემუშავებაზე.

ფედოროვმა აღნიშნა, რომ უკრაინა დაინტერესებულია SAMP/T, Mistral და Crotale სისტემების, ასევე მათთვის განკუთვნილი საბრძოლო მასალის მიწოდების გაგრძელებით. ის და მისი ფრანგი კოლეგა შეთანხმდნენ, რომ იმუშავებენ SAMP/T სისტემის გაუმჯობესებაზე, რათა უფრო ეფექტურად გაუმკლავდნენ ბალისტიკურ საფრთხეებს.

ამასთან, უკრაინის თავდაცვის სამინისტროს ცნობით, ქვეყანაში ფრანგული მრავალფუნქციური მოიერიშე თვითმფრინავის Mirage 2000-ის ახალი პარტიის გაგზავნა იგეგმება.

უწყების ცნობით, ეს არის უკრაინის თავდაცვის მინისტრ მიხაილ ფედოროვსა და საფრანგეთის შეიარაღებული ძალების მინისტრ კატრინ ვოტრენს შორის გამართული მოლაპარაკებების ერთ-ერთი შედეგი.

კერძოდ, მინისტრებმა უკრაინის ავიაციისა და საჰაერო თავდაცვის შესაძლებლობების გაძლიერება განიხილეს.

„ფრანგული მხარე უკრაინისთვის Mirage 2000-ის თვითმფრინავების გადაცემისთვის ემზადება“, - ნათქვამია განცხადებაში.

გარდა ამისა, უწყების ინფორმაციით, გრძელდება მუშაობა უკრაინაში AASM Hammer-ის ტიპის მართვადი საჰაერო ბომბების რეკორდული რაოდენობის მიწოდებაზე, ასევე, Aster-ის ტიპის ანტიბალისტიკური რაკეტების წარმოებისა და მიწოდების დაჩქარებაზე.

„განხილვის პროცესშია უკრაინისთვის შორი მოქმედების იარაღის, კერძოდ, SCALP-ის რაკეტების მიწოდება“, - აღნიშნულია უკრაინის თავდაცვის სამინისტროს განცხადებაში.