თუკი ბესარიონ ჟვანიაც დამნაშავეა ამ თემის ირგვლივ [ნიკო კვარაცხელიას მკვლელობის საქმეზე], ვიტყვი ერთს: ძალიან მძიმეა ეს ბრალდება, მაგრამ ხაზი უნდა გავუსვათ, რომ მისი და არამხოლოდ ამ ადამიანის ტრაგედია განაპირობა იმ ისტერიულმა, ბოროტმა ატმოსფერომ, რომელიც განზრახ იქნა შექმნილი იმ პერიოდში, - ამის შესახებ პარლამენტის პირველმა ვიცე-სპიკერმა, გია ვოლსკიმ ნიკო კვარაცხელიას საქმეზე საუბრისას განაცხადა, რითაც პროკურატურის მიერ გავრცელებულ ინფორმაციას გამოეხმაურა იმის თაობაზე, რომ უწყება ნიკო კვარაცხელიას შეკვეთით, ჯგუფურად განზრახ მკვლელობის ორგანიზების ფაქტზე გურამ კაკულიას, დავით კაკულიას და ასევე, ყოფილი პრემიერ-მინისტრის, ზურაბ ჟვანიას შვილს, ბესარიონ (ბუსა) ჟვანიას ბრალდებას წარუდგენს.

როგორც ვოლსკიმ ჟურნალისტებთან აღნიშნა, „იმ პერიოდში ძალიან ბევრი ახალგაზრდა როგორც ფსიქოლოგიურად, ასევე მისი ქცევის მანერით, აბსოლუტურად ამოვარდა შესაძლო პოზიტიური მომავლის პერსპექტივიდან“.

„ეს ათეულობით ადამიანს ეხება და სამწუხარო იქნება, თუ ბესარიონთან დაკავშირებითაც ეს იქნება დადგენილი. ყველა მეცოდება, მაგრამ ფაქტია, რომ დანაშაული სასჯელის გარეშე არ დარჩება“, - განაცხადა ვოლსკიმ.

მისივე თქმით, ნიკო კვარაცხელიას მკვლელობა „ძალიან დიდი ბოროტებაა“.

„გამოძიება მიმდინარეობდა ინტენსიურად, არ შეწყვეტილა. ძალიან დიდი ბოროტება იქნა ჩადენილი - შესანიშნავი ახალგაზრდა მოკლეს და ამასთან დაკავშირებით ვერ გეტყვით, რომ რაიმე პოლიტიკურმა კონიუნქტურამ შეიძლება გადასძალოს გამოძიების სამართლიანობა და არ იქნეს ბოლომდე საკითხი მიყვანილი. დეტალებზე, რატომ არ იქნა თავის დროზე გამჟღავნებული, ამასთან დაკავშირებით მე ინფორმაცია არ მაქვს, ალბათ, პროკურატურა იტყვის. ფაქტია, რომ ხარისხიანი გამოძიება მიმდინარეობს და პასუხისგების გარეშე არავინ დარჩება“, - განაცხადა ვოლსკიმ.

ცნობისთვის, თბილისის პროკურორის, გიორგი მიქაიას განცხადებით, საქართველოს პროკურატურამ ნიკო კვარაცხელიას მკვლელობის საქმე გახსნა. მისი თქმით, პროკურატურა ნიკო კვარაცხელიას შეკვეთით, ჯგუფურად განზრახ მკვლელობის ორგანიზების ფაქტზე გურამ კაკულიას, დავით კაკულიას და ბესარიონ ჟვანიას ბრალდებას წარუდგენს. ყოფილი პრემიერ-მინისტრის, ზურაბ ჟვანიას შვილზე, ბესარიონ (ბუსა) ჟვანიაზე კანონით დადგენილი წესით გამოცხადდება ძებნა.

პროკურატურის ცნობით, გურამ და დავით კაკულიებმა ნიკოლოზ კვარაცხელიას შეკვეთით მკვლელობის განზრახვა მათ მეგობარს ბესარიონ ჟვანიას გაანდეს და შეთანხმდნენ მოეხდინათ ნიკოლოზ კვარაცხელიას მკვლელობის ორგანიზება. ბესარიონ ჟვანიამ დაიწყო დანაშაულის ამსრულებლის მოძიება, რა მიზნითაც იგი მის ნაცნობებს ალეკო ჭელიძეს და გიორგი კავილაძეს დაუკავშირდა, შესთავაზა მათ ძმები კაკულიების შეკვეთით მოეხდინათ ნიკოლოზ კვარაცხელიას ჯგუფური მკვლელობა, რაზედაც ისინი დათანხმდნენ. ალეკო ჭელიძე და გიორგი კავილაძე ბესარიონ ჟვანიას ორგანიზებით, 2021 წლის ივლისსა და აგვისტოში სომხეთის რესპუბლიკაში რამდენჯერმე გაემგზავრნენ ამავე ქვეყანაში მყოფი მკვლელობის შემკვეთებთან გურამ და დავით კაკულიებთან შესახვედრად, სადაც ისინი მკვლელობის ორგანიზებისათვის აუცილებელ მითითებებს გასცემდნენ.