„ქართული რესპუბლიკის“ წევრების განცხადებით, მათი წარმომადგენლები გიორგი თავართქილაძე და ლევან ნიშნიანიძე ირანის საელჩოს მიერ ისლამური რევოლუციის წლისთავთან დაკავშირებით გავრცელებული მოსაწვევის თაობაზე ირანის ელჩს შეხვდნენ.

როგორც „ქართული რესპუბლიკის“ წევრებმა პრესკონფერენციაზე აღნიშნეს, შეხვედრა ელჩის ინიციატივით გაიმართა და მან წუხილი გამოთქვა XVII საუკუნის დასაწყისში მომხდარი ტრაგიკული მოვლენების გამო.

მათივე განცხადებით, მისასალმებელია შეხვედრის შემდგომ ელჩის მიერ გაკეთებულ დამატებით განცხადებაში ხსენებული მოვლენის ტრაგიკულობასა და გადასახლების ტკივილზე ხაზგასმა.

„როგორც მოგეხსენებათ, ირანის საელჩოს მიერ გავრცელებულმა მოსაწვევმა და ელჩის სიტყვამ, სადაც მე-17 საუკუნის უმძიმეს ტრაგედიასთან და გენოციდთან დაკავშირებული ჩვენი თანამემამულეების დეპორტაცია ირანში „ქართველების ჩასვლად“ იყო მოხსენიებული, ჩვენი საზოგადოების სამართლიანი გულისწყრომა გამოიწვია.

სამწუხაროდ, ამას არავითარი რეაგირება არ მოჰყოლია “ქართული ოცნების” მხრიდან. შედეგად, გადავწყვიტეთ საპროტესტო წერილი გადაგვეცა ირანის საელჩოსთვის. აღვნიშნეთ, რომ პროტესტს გამოვხატავთ იმასთან დაკავშირებით, როგორც იყო მოხსენიებული ქართველთა იძულებითი გადასახლება, და რომ ეს განხორციელდა ქართველების ფაქტობრივად გენოციდის კონტექსტში. მივაწოდეთ ის ინფორმაცია, რაც საჭიროდ ჩავთვალეთ, რომ უნდა გაეთვალისწინებინა.

მას შემდეგ, რაც ოფიციალური საპროტესტო წერილით მივმართეთ საელჩოს, თავად ელჩმა, ბატონმა სეიედ ალი მოჯანიმ, გამოთქვა ჩვენთან შეხვედრის სურვილი.

კიდევ ერთხელ აღვნიშნეთ, რომ შაჰ-აბასის მიერ განხორციელებული ჰუმანიტარული კატასტროფა და ქართველების იძულებითი გადასახლება ფერეიდანში არის ჩვენი ერის უდიდესი ტრაგედია.

აქვე შევნიშნავთ, რომ მისასალმებელია შეხვედრის შემდგომ ელჩის მიერ გაკეთებულ დამატებით განცხადებაში ხსენებული მოვლენის ტრაგიკულობასა და გადასახლების ტკივილზე ხაზგასმა. აგრეთვე, ვაფასებთ, რომ ჩვენ მიერ გადაცემული წერილის შემდგომ, ელჩმა გამოხატა შეხვედრის სურვილი და ჩვენი პოზიციის მოსმენის მზაობა. ჩვენ გავაკეთეთ ის, რაც აუცილებელი იყო, რომ გაგვეკეთებინა. ვხედავდით, სიჩუმეს და დუმილს. ხმამაღლა დავაფიქსირეთ ის პროტესტი, რაც გვაწუხებდა, როგორც ქართველი ხალხის ნაწილს”,- აღნიშნა გიორგი თავართქილაძემ.

შეგახსენებთ, მედიაში გავრცელებული ინფორმაციის თანახმად, 11 თებერვალს საქართველოში ირანის ისლამური რესპუბლიკის საელჩოს მოწყობილ ღონისძიებაზე აღნიშნეს 1979 წლის ისლამური რევოლუციის 47-ე წლისთავი. საელჩოს ღონისძიების მოსაწვევზე, - რომელიც აკადემიური, პოლიტიკური და დიპლომატიური წრეების წარმომადგენლებს დაურიგეს, - ინგლისურ ენაზე ეწერა: “ირანში ქართველების ჩასვლის 410 წლისთავი“.