თუკი ადამიანი კონკრეტულ დანაშაულებრივ საქმეში არის ჩართული, კეზერაშვილი იქნება, ლილუაშვილი, თუ კილაძე, რასაკვირველია, პასუხისგებაში მიეცემა, - ამის შესახებ პარლამენტის პირველმა ვიცე-სპიკერმა, გია ვოლსკიმ ე.წ. ქოლცენტრების საქმეზე განაცხადა.

მისი თქმით, ხელისუფლების პასუხისმგებლობა გამოიხატება იმაში, რომ დამნაშავეები განსასჯელის სკამებზე აღმოჩნდნენ.

"თუკი არის ადამიანი ჩართული კონკრეტულ დანაშაულებრივ საქმეში, კეზერაშვილი იქნება, ლილუაშვილი, თუ კილაძე, რასაკვირველია, პასუხისგებაში მიეცემა. რაც შეეხება ხელისუფლების პასუხისმგებლობას - უნდა ვაღიაროთ, საკმაოდ რთული გამოსავლენი დანაშაულია, მაგრამ რეალურად, პასუხისმგებლობა გამოიხატება ამ შემთხვევაში იმით, რომ ბევრი ასეთი დანაშაული არის გამოვლენილი და დამნაშავეები განსასჯელის სკამებზე აღმოჩნდნენ",-განაცხადა ვოლსკიმ.

ცნობისთვის, საქართველოს პროკურატურის განცხადებით, „ქოლცენტრების“ მორიგი მასშტაბური დანაშაული გამოავლინეს და ორგანიზებული ჯგუფის მიერ ჩადენილი თაღლითობის და ფულის გათეთრების ბრალდებით, ათი პირის მიმართ სისხლისსამართლებრივი დევნა დაიწყო. უწყების ცნობით, ბრალდება დაუსწრებლად წარედგინებათ მიმალვაში მყოფ საქართველოს ყოფილ გენერალურ პროკურორს ოთარ ფარცხალაძეს და მისი დანაშაულებრივი ჯგუფის წევრებს - დავით მიქაძეს, ირაკლი სეხნიაშვილს და მიხეილ ჩოხელს, ხოლო ბრალდების დადგენილება პირადად გაეცნობა, სხვა სისხლის სამართლის საქმეზე სასჯელაღსრულების დაწესებულებაში მოთავსებულ გიორგი მიქაძეს. ამავე სისხლის სამართლის საქმეზე დაკავებულია ორგანიზებული დანაშაულებრივი ჯგუფის წევრი ელისო კილაძე. ბრალდების დადგენილება ასევე წარედგინებათ ჯგუფის სხვა წევრებს - გივი ჯიბლაძეს, ბენ ანორს, თორნიკე ჯანელიძეს და გიორგი კამლაძეს, რომლებმაც ქმედითად ითანამშრომლეს გამოძიებასთან და არა მხოლოდ აღიარეს ჩადენილი დანაშაული, არამედ არსებითად შეუწყვეს ხელი ტრანსნაციონალური დანაშაულის გახსნას. გენერალური პროკურატურის ინფორმაციით, ოთარ ფარცხალაძის, გიორგი მიქაძის, დავით მიქაძის, ირაკლი სეხნიაშვილის, მიხეილ ჩოხელის, ელისო კილაძის, გივი ჯიბლაძის, ბენ ანორის, თორნიკე ჯანელიძის და გიორგი კამლაძის მიმართ, საქართველოს სისხლის სამართლის კოდექსის 180-ე და 194-ე მუხლებით გამოტანილი ბრალდება, სასჯელის სახედ და ზომად 9-დან 12 წლამდე თავისუფლების აღკვეთას ითვალისწინებს. როგორც პროკურატურაში აღნიშნავენ, ელისო კილაძის, გიორგი მიქაძის და მიმალვაში მყოფი ბრალდებულების - ოთარ ფარცხალაძის, დავით მიქაძის, ირაკლი სეხნიაშვილის და მიხეილ ჩოხელის მიმართ პატიმრობის შეფარდების, ხოლო გამოძიებასთან თანამშრომლობის ხარისხის გათვალისწინებით, გივი ჯიბლაძის, ბენ ანორის, თორნიკე ჯანელიძის და გიორგი კამლაძის მიმართ გირაოს შეფარდების მოთხოვნით, სასამართლოს კანონით დადგენილ ვადაში მიმართავენ.