ფულის გათეთრება - უკანონო შემოსავლის ლეგალიზაციის კონტექსტში, თავისი არსით წარმოადგენს დამოკიდებულ დანაშაულს, მას წინ უნდა უძღოდეს პრედიკატი დანაშაული, რაც შეიძლება გამოიხატებოდეს სხვადასხვა დანაშაულებრივ ქმედებაში, რომლითაც შესაძლებელია დანაშაულებრივი შემოსავლის მიღება, - ამის შესახებ „ინტერპრესნიუსს“ საქართველოს პროკურატურაში განუცხადეს, რითაც ჟურნალისტ ელისო კილაძის ადვოკატის განცხადებას უპასუხეს იმის თაობაზე, რომ „სამართლებრივად დაუშვებელია ბრალდებულის ქმედების კვალიფიკაცია სსკ-ის 180-ე და სსკ-ის 194-ე მუხლების ერთობლიობით“.

როგორც პროკურატურაში განმარტავენ, ბრალდებულ ელისო კილაძის ქმედების აღნიშნული კვალიფიკაცია სრულად შეესაბამება საქართველოს კანონმდებლობის, ფულის გათეთრების სფეროში მოქმედი საერთაშორისო კონვენციების მოთხოვნებსა და საქართველოს სასამართლოების მიერ მიღებული და კანონიერ ძალაში შესული განაჩენებით დადგენილ პრაქტიკას.

„ფულის გათეთრება - უკანონო შემოსავლის ლეგალიზაციის კონტექსტში, თავისი არსით წარმოადგენს დამოკიდებულ დანაშაულს, მას წინ უნდა უძღოდეს პრედიკატი დანაშაული, რაც შეიძლება გამოიხატებოდეს სხვადასხვა დანაშაულებრივ ქმედებაში, რომლითაც შესაძლებელია დანაშაულებრივი შემოსავლის მიღება. მაგალითისათვის თაღლითობის შედეგად მართლსაწინააღმდეგოდ მისაკუთრებული ქონება.

პრედიკატი დანაშაული და უკანონო შემოსავლის ლეგალიზაცია წარმოადგენს ორ დამოუკიდებელ დანაშაულს, მათ მიერ ხდება სხვადასხვა სიკეთის დაცვა - თაღლითობის შემთხვევაში დაცვის ობიექტია კონკრეტული პირის თუ სახელმწიფოს საკუთრება, ხოლო ფულის გათეთრების შემთხვევაში დაცვის ობიექტია ქვეყნის ეკონომიკური და საფინანსო სისტემის სტაბილურობა, როდესაც სისხლისსამართლებრივი დევნა იწყება სსკ-ის 180-ე და 194-ე მუხლებით, სახეზე გვაქვს დანაშაულის რეალური ერთობლიობა - პირველი შემთხვევაში გვაქვს უკანონო სარგებლის მიღება, ხოლო მეორე შემთხვევა არის გაგრძელება დანაშაულებრივი ქმედების რომელიც განსხვავებული განზრახვის ფარგლებში ყალიბდება და მიზნად ისახავს მიღებული უკანონო შემოსავლის გასუფთავებას, მისი წარმომავლობის დაფარვას.

ბრალდებულის ქმედების აღნიშნული კვალიფიკაცია სრულად შეესაბამება საქართველოს კანონმდებლობის, ფულის გათეთრების სფეროში მოქმედი საერთაშორისო კონვენციების მოთხოვნებსა და საქართველოს სასამართლოების მიერ მიღებული და კანონიერ ძალაში შესული განაჩენებით დადგენილ პრაქტიკას“, - აცხადებენ პროკურატურაში.

შეგახსენებთ, ელისო კილაძის ადვოკატმა ვალერი გელბახიანმა განაცხადა, რომ სამართლებრივად დაუშვებელია ბრალდებულის ქმედების კვალიფიკაცია სსკ-ის 180-ე და სსკ-ის 194-ე მუხლების ერთობლიობით.